На беларуска-літоўскай мяжы зноў вялізныя чэргі

Источник материала:

Сёння, 15 кастрычніка, ад раніцы на мяжы Беларусі і Літвы зноў утварыліся вялікія чэргі – у літоўскіх пунктах пропуску ў аўтаматызаваных сістэмах здарыўся збой і афармленне там праходзіць у ручным рэжыме.

Пра гэта паведамляе TUT.by са спасылкай на агенцтва БелаПАН.

Па словах прэс-сакратара Дзяржаўнага пагранічнага камітэта Беларусі Аляксандра Цішчанкі, найбольш складаная сітуацыя – у "Каменным Логу" і "Катлоўцы". Чаканне перасячэння мяжы складае ад чатырох да васьмі гадзін.

Паводле інфармацыі сайта Дзяржпагранкамітэта, у "Катлоўцы" на ўездзе ў Літву стаяць у чарзе 100 грузавых і 180 легкавых аўтамабіляў. У "Каменным Логу" – 300 і 100 адпаведна.

Дзяржпагранкамітэт Беларусі ў гэтай сітуацыі раіць або ўвогуле ўстрымацца ад перасячэння мяжы 15 кастрычніка, або аб'язджаць праблемныя пункты пропуску.

Аддзел інфармацыі, паводле TUT.by.