Рэпетыцыйнае тэсціраванне замест урокаў

Источник материала:

Перанос рабочага дня з пятніцы 9 сакавіка на нядзелю 11 сакавіка паставіў пад пытанне ўдзел старшакласнікаў у рэпетыцыйным тэсціраванні. Згодна з зацверджаным графікам, менавіта 11 сакавіка ў многіх ВНУ павінна было прайсці рэпетыцыйнае тэсціраванне па экзаменацыйных дысцыплінах. Як вядома, працэдура гэта платная — здача адной дысцыпліны каштуе 30 тысяч рублёў. Да таго ж будучыя абітурыенты імкнуцца загадзя зарэгістравацца для ўдзелу ў "рэпетыцыі" ўступных экзаменаў, тым больш што зараз у краіне праходзіць апошні (трэці) раўнд рэпетыцыйнага тэсціравання. Таму парушаныя планы многім сапсавалі настрой.

— У Міністэрства адукацыі таксама паступалі ад абітурыентаў аналагічныя пытанні, — паведаміла журналісту "Звязды" прэс-сакратар міністра адукацыі Юлія Ваніна. — Таму мусім усіх заспакоіць: навучальным установам прадастаўлена права (з улікам іх спецыфікі) перанесці рабочы дзень у іншым парадку. Калі ж у некаторых старшакласнікаў заняткі ў навучальнай установе супадаюць з часам правядзення рэпетыцыйнага тэсціравання, то па заяве іх бацькоў ці іншых законных прадстаўнікоў будучыя абітурыенты змогуць прапусціць урокі, каб пайсці на рэпетыцыйнае тэсціраванне.

Надзея НІКАЛАЕВА.