Загадчыка кафедры ва ўніверсітэце паставілі выдаваць лыжы

Источник материала:

Прычына ў тым, што тут скарацілі лабаранта.

Аляксандр Шароў, загадчык кафедры лёгкай атлетыкі, плавання і лыжнага спорту факультэта фізвыхавання Брэсцкага ўніверсітэта імя Пушкіна, тлумачыць:

"Яшчэ летась восенню нам сказалі, што ў кожнай ВНУ скарачаюць па 15 ставак лабарантаў. Наша кафедра адзіная, дзе пакінулі толькі палову стаўкі лабаранта з абавязкам матэрыяльнай адказнасці. Я сам выдаваў лыжныя чаравікі - загадчык кафедры! Стаяў, кантраляваў, бо цяпер гэта ўсё на мне лічыцца. Лабарант звольніўся, і ўсю матэрыяльную адказнасць паводле закону перапісалі на мяне. Цяпер на мне 236 мільёнаў, 1360 адзінак інвентару. Як знайсці чалавека на матэрыяльную адказнасць?"

Ранейшы лабарант не захацеў заставацца на палову стаўкі, бо гэта 800 тысяч рублёў. Між тым працы багата: толькі на выдачу лыж ідзе каля 4 гадзін у дзень. А яшчэ трэба рамантаваць інвентар. Узімку гэта азначае - клеіць чаравікі і лыжы, рамантаваць палкі.

Кіраўнік кажа, што звяртаўся з прапановай да студэнтаў-завочнікаў уладкаваць на працу, але тыя адмаўляюцца. Па іх словах, месячны заробак лабаранта яны прывозяць за дзённы камерцыйны візіт у Польшчу.

Выкладчыкі кафедры папрасілі ў рэктарата знайсці магчымасці, каб узяць у штат патрэбнага супрацоўніка. У адказ рэктарат папрасіў, каб кафедра знайшла кагосьці на ранейшых умовах.