Да карысных спраў заўжды гатовы!

Источник материала:

Напярэдадні Дня піянерскага сяброўства, які адзначаецца 19 мая, чырвона-зялёныя гальштукі ўпершыню з’явіліся на грудзях 33 школьнікаў раёна, акцябратамі ў гэты дзень сталі 128 маленькіх глушчан. Урачыстае мерапрыемства прайшло ў Глуску на Алеі Славы з удзелам піянерскіх дэлегацый Заеліцкага, Клятнянскага, Усцярхоўскага навучальна-педагагічных комплексаў, а таксама СШ № 1, СШ № 2 і гімназіі.

Урачыстасць адкрыла старшыня раённага савета Беларускай рэспубліканскай піянерскай арганізацыі Святлана Каржнёва, яна пажадала юнаму пакаленню радасных дзён, цікавых знаходак і заўжды быць першымі ў добрых і карысных справах. Радасць і хваляванне заўважаліся на тварах па-святочнаму апранутых хлопчыкаў і дзяўчынак. Праз імгненне яны папоўняць дружную піянерскую сям’ю, а перад гэтым дадуць абяцанне быць патрыётамі сваёй краіны, добра вучыцца, быць сумленнымі і справядлівымі, з годнасцю адстойваць інтарэсы піянерскай арганізацыі. Права павязаць гальштукі і прымацаваць акцяб-рацкія зорачкі было дадзена гасцям мерапрыемства — ветэрану піянерскага руху Святлане Мікалаеўне Дзяшчэні, намесніку дырэктара Цэнтра творчасці Ганне Януш, галоўнаму спецыялісту раённага камітэта БРСМ Ганне Мартынавай, а таксама педагогам-арганізатарам і піянерам-актывістам. На заклік “Да спраў на карысць Радзімы, да дабра і справядлівасці будзьце гатовы!” піянеры і акцябраты ўпэўнена адказалі “Заўжды гатовы!”.

Добрае ўражанне ва ўдзельнікаў свята пакінула вершаванае выступленне піянераў Заеліцкага НПК, пасля чаго ў гонар урачыстага прыёма ў акцябраты і піянеры прысутныя ўсклалі кветкі да помнікаў на Алеі Славы. А напрыканцы піянерскага свята ўсіх чакаў сапраўдны музычны падарунак — танцавальны флэшмоб, да якога з радасцю далучыліся як дзеці, так і дарослыя.

Г. АЎТУХОВА

Фота аўтара