Цяпер стадыён на ўзроўні

Источник материала:

У ГЛЫБОКІМ адбылося ўрачыстае адкрыццё адміністратыўнага будынка і спартыўна-гульнявой залы раённай спартыўнай дзіцяча-юнацкай школы алімпійскага рэзерву. Такім чынам, завершана трэцяя і апошняя чарга па карэннай рэканструкцыі гарадскога стадыёна.

З гэтай падзеяй глыбачан і ўдзельнікаў урачыстасці павіншавалі міністр спорту і турызму Рэспублікі Беларусь Аляксандр Шамко, член нацыянальнай каманды краіны па цяжкай атлетыцы Марына Шкерманкова.

Як вядома, першы медаль для нацыянальнай каманды Рэспублікі Беларусь на ХХХ Алімпійскіх гульнях 2012 года ў Лондане прынесла глыбачанка Марына Шкерманкова. Падчас інтэрв’ю шматлікім прадстаўнікам прэсы з розных краін свету яна абавязкова ўпамінала, што самыя першыя і самыя важныя крокі ў спорт зрабіла ў родным Глыбокім, і менавіта ў спартыўна-гульнявой зале гарадскога стадыёна.

Два апошнія гады гэта зала была закрытая па тэхнічных прычынах: будынак патрабаваў значнага капітальнага рамонту і вялікіх фінансавых сродкаў. Генеральнаму падрадчыку аб’екта, ПУП «Глыбоцкая ПМК», давялося мяняць не толькі падлогу, дах, але і ўмацоўваць фундамент, сцены, абсталёўваць памяшканні, выкарыстоўваючы сучасныя матэрыялы і тэхналогіі. На ўсё пайшло 15 мільярдаў рублёў з рэспубліканскага, абласнога і раённага бюджэтаў.

Ганаровае права перарэзаць чырвоную стужку спартыўна-гульнявой залы было прадстаўлена намесніку старшыні аблвыканкама Уладзіміру Цярэнцьеву і старшыні Глыбоцкага райвыканкама Алегу Морхату. Сімвалічны ключ аб’екта быў уручаны Уладзіміру Бука, дырэктару раённай спартыўнай дзіцяча-юнацкай школы алімпійскага рэзерву.

— Сённяшняя падзея з’яўляецца знакавай для раёна, — падкрэсліў у сваім выступленні старшыня райвыканкама Алег Морхат. — Аб перавагах здаровага вобразу жыцця ведаюць практычна ўсе. Калі мы навучым дзяцей з самага ранняга ўзросту цаніць, берагчы і ўмацоўваць здароўе, то можна спадзявацца, што наступныя пакаленні будуць больш здаровыя і развітыя не толькі духоўна, інтэлектуальна, але і фізічна.

Аб увазе дзяржавы да развіцця фізкультуры і спорту паведаў намеснік старшыні Віцебскага аблвыканкама Уладзімір Цярэнцьеў. Толькі за апошні час у вобласці здадзены такія спартыўныя аб’екты, як шматфункцыянальная зала ў Віцебску, лыжаролерная траса ў Наваполацку, цэнтр па алімпійскіх відах грэблі ў Полацку. У маі-чэрвені будуць уведзены ў строй Лядовы палац у Оршы, зала для барцоў рознага стылю ў Віцебску. Толькі за мінулы год колькасць жыхароў вобласці, якія займаюцца спортам, узрасла на 10 тысяч чалавек і дасягнула 222 тысяч. Спартсмены Прыдзвінскага краю заваявалі летась на розных чэмпіянатах, першынствах Еўропы і свету 133 медалі, у тым ліку 45 залатых і 46 — сярэбраных.

Першымі спартыўна-гульнявую залу апрабавалі дзеці: каманды з Лужкоў, Шаркоўшчынскага раёна, і спартыўнай дзіцяча-юнацкай школы Глыбокага. Хто ведае: пройдзе час і, мажліва, хтосьці з іх, як і Марына Шкерманкова, паднімецца на алімпійскі п’едэстал!..

Уладзімір САУЛІЧ, «БН»

Фота аўтара