СЦЯЖЫНКАМІ МАЛАДОСЦІ: ІНТЭРВ’Ю З ЭКАНАМІСТАМ ПА ПРАЦЫ ЎНІТАРНАГА ПРАДПРЫЕМСТВА «ГЛЫБОЦКІ МЯСАКАМБІНАТ» ЮЛІЯЙ БАХІР
11.02.2019
—
Афиша
|
І вось наша сустрэча адбылася. Кораценька пра сваю гераіню. Нарадзілася ў Глыбокім. Пасля заканчэння СШ №1 паступіла ў дзяржаўны эканамічны ўніверсітэт на факультэт менеджменту. Паспяхова закончыла яго. Завочна атрымала прафесію юрыста. Затым год адвучылася ў магістратуры. –Накапіла дыпломаў, і цяпер яны ляжаць у доме бацькоў на кніжнай паліцы, – з усмешкай падвяла вынікі сваёй шматгадовай вучобы Юлія. І гэтай вясёлай рэплікі хапіла для таго, каб у нас завязалася шчырая і адкрытая размова. –Юлія, а чаму вы выбралі прафесію эканаміста? –У мяне матэматычны склад розуму, я не гуманітарый. Вывучыцца на эканаміста мне параіла мая мама, яна ў мяне бухгалтар. Пасля вучобы нейкі час працавала па спецыяльнасці ў Мінску. Але захацелася дамоў, і мы, я і мой малады чалавек Аляксей Бахір, вырашылі вярнуцца ў Глыбокае. Было гэта ў кастрычніку 2014 года. На мясакамбінаце свабоднай аказалася вакансія эканаміста, і па субяседванні мяне ўзялі на працу. –І як напачатку адчувала сябе ў вялікім калектыве малады спецыяліст Юлія Бахір? – Ведаеце, мне пашанцавала. У мяне, як, мабыць, і ў кожнага маладога спецыяліста было нястрымнае жаданне з першых дзён як мага лепш заявіць пра сябе. І Анатоль Андрэевіч Дук, спецыялісты прадпрыемства падтрымалі мой парыў. На першым часе мне памагала начальнік аддзела Алена Аляксееўна Лушчонак, граматная, спакойная, ураўнаважаная жанчына. І сёння па любым пытанні я магу звярнуцца да яе і атрымаць падтрымку і карысныя парады. Праца па душы, таварыскі калектыў, таму мне сапраўды пашанцавала. –Давайце пагаворым пра свет вашых захапленняў. –Давайце. Люблю спорт. З шостага класа, калі трэнер Вольга Іванаўна Семяндзяк запрасіла мяне ў спартыўную секцыю, не расстаюся з валейболам. І ва ўніверсітэце гуляла, і сёння хаджу на трэніроўкі ў спартыўную залу нашага прадпрыемства. Выступаю і ў іншых відах спорту, і пастраляць магу. І муж у мяне такі ж актыўны. –Калі не памыляюся, гэта Аляксей Бахір? –Не памыляецеся. Так атрымалася, што з Лёшам мы сябравалі аж адзінаццаць гадоў, а пажаніліся год таму. Лёша – добры спартсмен, ён і ў футбол гуляе, ён – усюды, хіба што баскетболам не займаецца. І я цягнуся за ім. Ды і напамінае ён мне: “Займайся, бегай!”. Любім актыўны адпачынак. На турзлётах з мужам удзельнічаем ва ўсіх дысцыплінах. І ў мінулым годзе ў раёне мне прысвоілі званне “Лепшы турыст”. Нарэшце я яго заслужыла. Турызм! Гэта ж здорава! Збіраем рукзакі і на пару дзён – куды-небудзь з палаткай. У Карэлію ездзілі ўдваіх: на машыне, на цягніку, а там – пешшу, на байдарках… На веласіпедах ганяем. –А ці бывае такое: на веласіпеды – і кіламетраў на 50-100? –На 100 – не. Але ваколіцы Плісы, кіламетраў жа 25 будзе, на горніках аб’язджалі. Мы пастаянна ў руху. І не ведаем нават, што такое сум. –Вось сёння мы гутарым, а заўтра ў вас чарговая інтэлектуальная гульня. Мне сказаў пра гэта капітан вашай каманды “Всадники А” Сяргей Грыневіч і папрасіў, каб не вельмі загружаў вас сваімі пытаннямі. З кім гуляеце? –Гэта камерцыйная гульня, яна звычайна праходзіць раз у два тыдні ў кафэ “Неон”. Прыязджаюць каманды з іншых гарадоў, і ўсё адбываецца вельмі цікава і займальна. І – адказна. Канечне ж, нам вельмі хочацца перамагчы. –І перамагаеце? –Чатыры гульні дакладна выйгралі. Калі толькі пачыналі, у камандзе было не шмат людзей, цяпер жа – дзесяць. Канкурэнцыя вырасла, і трапіць у каманду не проста. Гуляюць толькі мацнейшыя. Таму прыходзіцца над сабой працаваць і працаваць. –І які прыз за перамогу? –Вялікая бутэлька шампанскага. –І чаму аддаяце перавагу: спорту, турызму ці інтэлектуальнай гульні? –У нас усё збалансавана, а ў дзень гульні трэніроўку ў спартыўнай зале пераносім на наступны дзень. –Кніга ў вашым жыцці? –Ой, дзякуй, што напомнілі: трэба ў бібліятэку кнігі здаць. Чытаю, але не меладраматычныя кнігі, над якімі звычайна плачуць жанчыны, а што-небудзь сур’ёзнае. Скажам, фантастыку. –Чым яшчэ захапляецеся, што любіце яшчэ? –(Усміхаецца). На канапе таксама люблю паляжаць. – На вашу думку, што такое шчасце? –Гэта калі прыходзіш дамоў, і цябе з усмешкай сустракае любімы муж. І ты ведаеш, ты проста ўпэўнена, што ён ва ўсім заўсёды цябе падтрымае. –І якой сябе бачыць Юлія Бахір, скажам, гадоў праз дзесяць? –Шчаслівай у сямейным жыцці і запатрабаванай на працы. А яшчэ хачу, каб к гэтаму часу, а лепш, каб раней, у нас быў свой уласны дом, а ў доме – сабака. –Што ж, хай збываюцца вашы мары. –Дзякуй. Чтобы разместить новость на сайте или в блоге скопируйте код:
На вашем ресурсе это будет выглядеть так
На гадавым свяце аграрыяў ці не ўпершыню ўзнагароджаны былі і спартсмены аграпрамысловага комплексу, якія дастойна абаранялі гонар раёна на абласных і...
|
|