Аматары актыўнага адпачынку не губляюць каштоўныя летнія дзянькі, настоеныя на сонцы, вадзе ды свежым паветры, стараюцца правесці іх з карысцю. Вядома ж, з аднаго боку, можна ўлетку і здароўе падмацаваць, а з другога боку, высветліць, хто варты звацца найлепшым турыстам. Як гаворыцца, спалучыць карыснае з прыемным.
Менавіта з такімі думкамі выбіраліся 17 прадстаўнікоў Жабінкаўскай жыллёва-камунальнай гаспадаркі на абласны турзлёт, які ладзіўся 29, 30 чэрвеня і 1 ліпеня ў турыстычна-аздараўленчым комплексе “Белае возера”. Тут, у маляўнічым куточку, размешчаным у Брэсцкім раёне, і разгарнуліся сапраўдныя баталіі паміж 16 камандамі, якія прадстаўлялі ўсе без выключэння раённыя пярвічкі Брэсцкай абласной арганізацыі Беларускага прафесійнага саюза работнікаў мясцовай прамысловасці і камунальна-бытавых прадпрыемстваў.
Бліжэй да абеду ў пятніцу 29 чэрвеня, нібы грыбы пасля дажджу, вырас сапраўдны палатачны гарадок. І ўжо ў першы дзень – без усялякіх доўгіх ваганняў! – удзельнікаў чакалі спаборніцтвы па спартыўным арыентаванні ды веласпорце (так званы крос-кантры, дзе рух нагадвае пераадольванне пера-шкод па перасечанай мясцовасці, як звычайна бывае ўдалечыні ад буйных населеных пунктаў).
Аднак найбольш важныя іспыты (адразу скажам, і надзвычай паспяховыя) чакалі каманду жабінкаўскіх камунальнікаў, якую ўзначальвала вядучы спецыяліст па ідэалагічнай рабоце і старшыня прафкама прадпрыемства Наталля Рэва, у наступны, суботні дзень.
З самага ранку ладзіўся конкурс на лепшую прэзентацыю летніка “Тут вам не курорт, а прафсаюзны турзлёт”. Жабінкаўцы паказалі сабе настолькі крэатыўнымі, падрыхтаванымі і актыўнымі турыстамі, што атрымалі па выніках гэтага конкурсу другое месца сярод 16 зборных.
Агульнакамандны поспех неўзабаве падтрымалі і прадстаўнікі асобных спартыўных відаў. Найбольшая ўдача спрыяла нашым землякам у спаборніцтвах на вадзе і веласіпедах.
Дзеля выканання элементаў “брама”, “васьмёрка”, “прыступкі”, “арэлі” ды іншых на жалезных двухколавых “конях” спаборнічалі чацвёра прадстаўнікоў Жабінкаўскай ЖКГ: Андрэй Курыга, Уладзімір Сцепанюк, Вольга Печур і Алена Самсонава. У выніку яны занялі трэцяе месца, пакінуўшы ззаду нямала годных сапернікаў.
У хуткім часе іх “бронзавы” вынік быў паўтораны і ў спаборніцтвах па тэхніцы воднага турызму. Прычым, і на гэты раз выдатна паказаў сябе Уладзімір Сцепанюк, які ў экіпажы з Аляксандрам Грабаўцом на байдарцы “Варзуга” здолеў стаць трэцім.
Пасля шматлікіх конкурсаў і выпрабаванняў усіх чакаў цудоўны вечар, аздоблены прыгожым фестывалем бардаўскай песні “Спевы ля вогнішча”. Пасля падвядзення вынікаў і ўзнагароджвання найлепшых, якое прайшло на наступны дзень, турысты-аматары з узнятым настроем вярталіся дамоў. Міжволі ўзнікла жаданне паўтарыць нешта падобнае ўласнымі сіламі і на Жабінкаўшчыне, усё ж прыгожых месцаў у нас досыць, ёсць і свае традыцыі ў турыстычнай справе.
Удзельнікі каманды выказваюць шчырую падзяку за дапамогу ў падрыхтоўцы да спаборніцтваў Генадзю Турыцыну, а дырэктару прадпрыемства Паўлу Заграю (Павел Пятровіч, дарэчы, асабіста паўдзельнічаў у злёце) – за падтрымку і разуменне.
Анатоль РОСТАЎ. Фота аўтара. Аматары актыўнага адпачынку не губляюць каштоўныя летнія дзянькі, настоеныя на сонцы, вадзе ды свежым паветры, стараюцца правесці іх з...