Главная
Гороскопы
Кожны чалавек выбірае будучую прафесію па-рознаму. Хтосьці ўжо з дзяцінства ведае, кім стане. Іншым падказваюць бацькі і родныя. А кагосьці да будучай прафесіі падводзіць само жыццё. Але галоўнае, каб потым работа табе дастаўляла задавальненне. Як, напрыклад, Ганне Віктараўне Рэпіха – маладому чалавеку года ў галіне абслугоўвання насельніцтва.
Ужо амаль сем гадоў яна працуе ў філіяле № 124 ААТ “АСБ Беларусбанк”. Пачынала з касы пераліку, потым перайшла ў аддзяленне АПК “Верхні Церабяжоў”, а зараз працуе спецыялістам па продажы банкаўскіх прадуктаў цэнтра банкаўскіх паслуг.
Калі на папярэдніх дзвюх пасадах даво-дзілася мець больш спраў з грашовымі сродкамі, то зараз Ганне даводзіцца значную частку часу размаўляць з кліентамі. Яна дапамагае афармляць заяўкі на банкаўскія карткі, падрыхтаваць дакументы на крэдыты, уклады, аказвае банк і страхавыя аперацыі насельніцтву. За дзень трэба дапамагчы да 30-ці чалавекам. Да таго ж усе людзі розныя, і да кожнага патрэбен індывідуальны падыход. Хтосьці больш-менш знаёмы з сучаснымі тэхналогіямі, таму адразу разумее, што трэба рабіць і куды ісці. Іншы ж упершыню трымае ў руках разліковую картку і баіцца лішні раз удакладніць.
Але Ганна сваю работу вельмі любіць, таму ні разу не пашкадавала аб выбранай прафесіі, бо праваць у банку хацела са школы і паступова ішла да сваёй мэты. Скончыла сярэднюю школу № 2 р. п. Рэчыца, пасля чаго паступіла ў Палескі дзяржаўны ўніверсітэт на факультэт банкаўскай справы. Праўда, кар’ерысткай дзяўчыну наўрад ці можна назваць. Каханне ўнесла свае карэктывы. На другім курсе яны пажаніліся з Дзмітрыем, а потым нарадзіўся сыночак Андрэй. Зараз гэта ўжо 11-гадовы хлопец, які вучыцца ў 5 класе. Ганна паспявала і на сесіі з’ездзіць, і сям’і час удзяліць. Безумоўна, дапамагалі бацькі – як свае, так і мужа. Моцна падтрымліваў каханы, якога і зараз Ганна лічыць самым лепшым мужчынам на свеце.
Вось і адпачынак з сям’ёй дзяўчына называе самым ідэальным. Калі ёсць час няспешна абмеркаваць планы на будучыню, паглядзець любімы фільм разам ці выбрацца на пікнік да рэчкі. У мінулым го-дзе ляталі адпачываць у Турцыю, былі і ў Егіпце. Не хоча мяняць традыцыю Ганна, таму з нецярпеннем чакае лета. Ды і муж, які працуе зараз памочнікам бурыльшчыка ў Расіі, з задавальненнем адправіцца адпачываць са сваёй прыгажуняй жонкай і сынам. Мараць пабываць у Ізраілі, які вабіць не толькі сваімі прыемнымі кліматычнымі ўмовамі, але і вялікай, цікавай гісторыяй.
Нягледзячы на сваю адказную работу (а ў банку іншай не бывае), Ганна ўпэўнена, што толькі ўсмешкай і пачуццём гумару можна знайсці выйсце з любой сітуацыі. А яшчэ настрой уздымае музыка, якую яна любіць паслухаць па дарозе ў аўтамабілі, якім кіруе больш за пяць гадоў, ці пасля працоўнага дня. Ганна лічыць сябе шчаслівым чалавекам, бо з радасцю ідзе на работу і з радасцю спяшаецца дадому.
Ганна МЕЛЬНІК
Фота аўтара