Мастацкiя рамёствы — для развiцця добрага густу i падтрымання нацыянальнай культуры

Источник материала:

Глыбiнка

Сюды прымаюць усiх, хто жадае, i сярод навучэнцаў, сцвярджаюць настаўнiкi, нямала здольных дзяцей. Дырэктар школы рамёстваў Рыгор Ягораў хоча, каб да мастацтва цягнулася больш дзяцей.

— Далучэнне да мастацтва шмат дае дзiцяцi, — упэўнены Рыгор. — У працэсе жыцця чалавек пастаянна павiнен развiвацца, а калi ён звязаны з мастацтвам, то ў любой прафесii гэта дае ўвогуле разуменне ўсяго — i вытворчасцi, i жыцця, i зносiнаў з людзьмi. Але ў першую чаргу ў маладога чалавека развiваецца добры густ.

У асiповiцкiх дзяцей найбольшай папулярнасцю карыстаюцца заняткi па выяўленчаму мастацтву. Па-першае, дызайнер i архiтэктар — цяпер модныя i запатрабаваныя прафесii. Ну а тыя, хто не марыць звязаць сваё прафесiйнае жыццё з мастацтвам, проста вучацца для сябе правiльна маляваць i бачыць свет ды фарбы.

А вось для керамiста галоўнае — адчуваць форму, рабiць яе сваiмi рукамi. Гэта для дзяцей нават незвычайна ў наш час, калi ўсе захапляюцца вiртуальнымi камп’ютарнымi гульнямi.

— Канешне, у нас складаная тэхналогiя, — згаджаецца настаўнiк керамiстаў Дзмiтрый Паляшчук, якi назiрае за тым, як 6-гадовы Дзянiс крэхча i размiнае глiну, каб вырабiць кубак. — Але ўвогуле працэс займальны i дзецям падабаецца назiраць, як рэч «вырастае» з кавалка глiны прама ў iх руках.

Крысцiна Салох i Яна Мархотка займаюцца керамiкай ужо гады тры — пачыналi з гуртка, а цяпер прыйшлi ў школу. Яны сочаць за малымi, якiя толькi праходзяць так званае «пасвячэнне ў керамiста». Яны спачатку робяць глiняную масу, а потым будуць спрабаваць нешта з яе ляпiць. Большасць работ дзецi забiраюць дадому, так што мара Дзянiса падарыць мацi кубак, сподак i потым чайнiк цалкам рэальная. Вынiк будзе — у гэтым упэўненыя i настаўнiкi школы мастацтваў, i яе навучэнцы.

У Асiповiцкай школе мастацкiх рамёстваў гавораць аб падтрымцы народных, нацыянальных традыцый i iх далейшым развiццi. У школе плануюць адкрыць новыя аддзяленнi — саломапляцення i разьбы па дрэву. У Асiповiцкiм раёне ёсць выдатныя майстры, якiя могуць выкладаць у школе.

Асiповiцкi раён.