Не паступiў... А праца знойдзецца?

Источник материала:

— Усе даведкi аб зменах будуць змешчаны ў новых правiлах, а таксама ў iнфармацыйных зборнiках для паступаючых у сярэднiя навучальныя ўстановы i ВНУ, якiя выходзяць штогод. Гэтыя даведачныя зборнiкi будуць надрукавны нашым цэнтрам i Мiнiстэрствам адукацыi ў першыя месяцы будучага года. Даведнiкi для паступаючых на новы, 2006 год, якiя можна сустрэць у кнiжных крамах ужо зараз, я набываць не рэкамендую. У iх шмат разыходжанняў, таму што выйшлi ў свет да зацвярджэння правiлаў i без улiку змяненняў, — папярэджвае Таццяна Васюк.

Як паказвае вопыт, значны конкурс, пры якiм на адно месца прэтэндуюць шэсць—восем чалавек, звычайна абумоўлены не вялiкай запатрабаванасцю, а малой колькасцю набору будучых студэнтаў на пэўную спецыяльнасць. Да ўвагi адзiнаццацiкласнiкаў: зараз на рынку працы асаблiва запатрабавальныя спецыялiсты ў сферы будаўнiцтва, вытворчасцi i сельскай гаспадаркi. Асаблiва гэта датычыцца тых, хто вырашыў паступаць у сярэднiя спецыяльныя навучальныя ўстановы. У краiне тых, хто мае рабочыя прафесii зараз назiраецца дэфiцыт. А вось спецыяльнасцi бухгалтара, сакратара, швачкi, тэхнiка-тэхнолага зараз не заўсёды запатрабаваныя.

Вызначыцца ж з выбарам будучай прафесii дапамогуць псiхолагi раённых цэнтраў прафесiйнай занятасцi моладзi, а ў Мiнску працуе Рэспублiканскi цэнтр прафесiйнай арыентацыi. Прайшоўшы тэсцiраванне па спецыяльнай камп’ютарнай праграме, абiтурыент даведаецца, якую прафесiю яму лепш за ўсё набыць i ў якую навучальную ўстанову ён мае больш шанцаў паспяхова здаць уступныя iспыты.

— Калi ж чалавек не трапiў з першага разу ў шэрагi студэнтаў, не трэба адчайвацца. Службы занятасцi прапануюць бясплатную падрыхтоўку па больш чым 70 спецыяльнасцях. Уведзены i новыя курсы, якiя рыхтуюць спецыялiстаў у сферы абслугоўвання — таксама вельмi неабходныя сёння прафесii. Маладому чалавеку выплачваецца стыпендыя беспрацоўнага (каля 30.000 рублёў) плюс да яе прыналежыць матэрыяльная дапамога (29.000 рублёў). Малазабяспечаныя атрымлiваюць 6 базавых велiчынь, — зазначае начальнiк аддзела прафарыентацыi i прафесiйнай адукацыi ўпраўлення службы занятасцi Мiнскай вобласцi Ганна Ерашова.

У сувязi з запатрабаванасцю ўведзены новыя спецыяльнасцi па агра- i экатурызму, майстра вырабаў з саломкi, сацыяльнага работнiка на вёсцы. У час навучання жыллё прадстаўляецца бясплатна. У далейшым, згодна з праграмай адраджэння i развiцця вёскi на 2005—2010 гг., маладыя спецыялiсты маюць права на атрыманне жылля не пазней чым праз 1-2 гады.

Калi абiтурыент паступiў на платнай аснове, дзяржава прадастаўляе права на атрыманне льготнага крэдыту на навучанне. Паводле iнфармацыi начальнiка юрыдычнага ўпраўлення Мiнгарвыканкама Iрыны Дрозд, права на атрыманне крэдыту маюць студэнты, якiя паступiлi ў дзяржаўныя навучальныя ўстановы, ВНУ прафсаюзаў i спажыўкааперацыi. Пры ўмове, што малады чалавек навучаецца на дзённай платнай форме i атрымлiвае першую вышэйшую адукацыю.

Даход сям’i студэнта за мiнулы год на кожнага яе члена павiнен быць не менш чым 511.520 рублёў. Пры гэтым бацькi абiтурыента самастойна выплачваюць 30 працэнтаў ад усёй неабходнай сумы сродкаў, астатнiя 70 працэнтаў iм на час «пазычыць» дзяржава. Вяртанне крэдыту пачынаецца праз месяц пасля атрымання дыплома.