Знакавы з’езд?

Источник материала:

Алена БЕЛЬСКАЯ, старшыня рэспублiканскага прафсаюза работнiкаў аховы здароўя

— Мы павiнны прааналiзаваць усе тыя недахопы, памылкi, якiя былi дапушчаны на працягу апошнiх гадоў. Прафсаюзы — арганiзацыя працоўных, якая павiнна быць па-за палiтыкай. Наша асноўная задача — сацыяльная абарона людзей. Пра гэта нельга забываць, i я думаю, што такi падыход да функцый прафсаюзаў павiнен пачаць актыўна фармiравацца ўжо зараз. Таму, на маю думку, з’езд у гэтым сэнсе павiнен стаць зыходным пунктам. Разумееце, у сённяшняй даволi складанай сацыяльна-эканамiчнай сiтуацыi, якая склалася ў нашай дзяржаве, цi не адным з галоўных, глабальных пытанняў з’яўляецца пытанне захавання сацыяльнага мiру i ўзаемаразумення. Каб дасягнуць пэўных станоўчых вынiкаў на гэтым шляху, павiнны быць узгодненыя дзеяннi ўрада, наймальнiкаў i прафсаюзаў. Паколькi вельмi важна, каб усе рашэннi, захады, што робiць, напрыклад, урад, улiчвалi б сацыяльны кошт канкрэтнага пытання. Я маю на ўвазе тое, каб ад гэтага не пацярпеў просты чалавек. На з’ездзе, думаю, усе гэтыя праблемы знойдуць свой водгук, i мы намецiм шляхi да iх вырашэння.

Юрый РОЎДА, старшыня рэспублiканскага прафсаюза работнiкаў нафтавай i газавай прамысловасцi.

— Самае галоўнае зараз, каб наладзiлiся добрыя адносiны сацыяльнага партнёрства. У гэтым накiрунку вельмi важна ўвесь час рухацца наперад. Апошнiя два гады партнёрства проста не было. Непасрэдна ў нашай галiне гэты працэс, канешне, нiколi не прыпыняўся, але зараз я вяду гаворку пра ўсю сiстэму ўвогуле. У гэтым плане з’езд, якi адбудзецца, павiнен стаць знакавай з’явай. Мы ў рэшце рэшт чакаем змен у гэтым глабальным пытаннi, ад яго вырашэння залежыць стратэгiя далейшага развiцця прафсаюзнага руху. Трэба сабрацца i абмеркаваць усе нашыя праблемы.

Эма АЛЕКСАНДРОВIЧ, старшыня Вiцебскага абласнога камiтэта прафсаюза работнiкаў аграпрамысловага комплексу

— Тая сiтуацыя, якая склалася ў прафсаюзах за апошнi час, нас вельмi трывожыла. Таму тыя змены, што зараз адбываюцца, мы ацэньваем як станоўчыя i доўгачаканыя. Прафсаюзы павiнны iснаваць як адзiная структура, трэба навесцi элементарны парадак, вярнуць усё тое станоўчае, што мы страцiлi за апошнiя гады. Надзеi на з’езд мы ўскладаем вялiкiя — трэба прыняць канкрэтны статут, сiстэматызаваць структуру, устанавiць адказнасць кадраў, вызначыць дакладныя функцыi арганiзацый усiх узроўняў. Таксама, магчыма, вырашыцца i пытанне па ўзносах. А калi казаць больш глабальна, то думаю, што з’езд дапаможа нам адчуць сябе менавiта арганiзацыяй, якая вырашае патрэбныя грамадству праблемы.