Роўныя правы — толькi пры пражываннi

Источник материала:

Сяргей РАСОЛЬКА

«ГАРАЧЫ» ТЭЛЕФОН «ЗВЯЗДЫ» 268-27-41

Ксенiя Паўлаўна Войнiч — грамадзянка Расiйскай Федэрацыi, але апошнiя 9 гадоў яна пастаянна пражывае ў Рэспублiцы Беларусь (у Стоўбцах), маючы пасведчанне на права жыхарства. «Так ужо склалася жыццё — муж у мяне ваенны — што дзецi нашы жывуць i ў Беларусi, i ў Расii. Зараз я хачу пераехаць на пастаяннае месца жыхарства ў Расiйскую Федэрацыю — там у мяне нарадзiўся праўнук. Чула, што ў такiх выпадках, калi чалавек пераязджае на пастаяннае жыхарства за мяжу, яму выплачваюць пенсiю адразу за шэсць месяцаў наперад. Тым больш што грамадзянам Расiйскай Федэрацыi, якiя пастаянна пражываюць на тэрыторыi Рэспублiкi Беларусь, прадастаўлены роўныя з беларускiмi грамадзянамi правы на пенсiйнае забеспячэнне. Але калi я звярнулася па месцы майго цяперашняга жыхарства ў органы сацыяльнай абароны, мне далi адмоўны адказ, маўляў, нiякай пенсii адразу за шэсць месяцаў наперад пры пераездзе плацiць не будзем. Чаму?

Вось што нам паведамiла начальнiк аддзела арганiзацыi пенсiйнага забеспячэння мiнiстэрства працы i сацыяльнай абароны Валянцiна Каралёва, адказваючы на гэтае пытанне заяўнiцы.

— Нiякiх парушэнняў з боку нашых раённых службаў няма: жанчыне далi правiльны адказ. Сапраўды, калi гаварыць пра згаданую сiтуацыю, грамадзяне Расiйскай Федэрацыi, якiя пражываюць у нашай краiне, i ўласна беларускiя грамадзяне маюць роўныя правы на пенсiйнае забеспячэнне. Але менавiта пры пражываннi, пры пераездзе ж (у тым лiку i калi беларус паедзе ў Расiю) выплаты спыняюцца i ўзнаўляюцца ўжо па новым месцы жыхарства. Такая сiтуацыя датычыцца не толькi расiйскiх грамадзян, але i, напрыклад, грамадзян Казахстана i iншых.