IМЯ, СЯСТРА, IМЯ!

Источник материала:

«Еўрабачанне-2006»

На час пасяджэння аргкамiтэту, паведамiлi ў прэс-службе Белтэлерадыёкампанii, свае заяўкi даслалi 73 выканаўцы. Падкрэслiм — гаворка iдзе менавiта пра выканаўцаў, а не пра конкурсныя песнi, бо некаторыя артысты прапанавалi па 3—4 кампазiцыi. Усе фанаграмы былi праслуханы аргкамiтэтам на прадмет адпаведнасцi правiлам адбору. Нагадаем, паводле палажэння конкурсу забаранялася не толькi заўчасная камерцыйная рэалiзацыя кампазiцыi (праз радыё, ТБ, Iнтэрнэт i г.д.), але i ўтрыманне ў тэксце заклiкаў да насiлля, тэрарызму, а таксама iнфармацыi, якая ганьбiла б рэпутацыю арганiзатараў. Песнi-«парушальнiкi», як гэта ўжо адбылося, напрыклад, на ўнутраным адборы Кiпра, дысквалiфiкуюцца.

Поўны спiс прэтэндэнтаў, якiя жадаюць прадставiць Беларусь на прэстыжным песенным форуме ў Афiнах, сёлета вырашана было не апублiкоўваць. Аднак вядома, што шчасця ў адборы на «Еўрабачанне-2006» паспытаюць не толькi беларускiя зоркi (свой удзел пацвердзiлi Iрына Дарафеева, Палiна Смолава, Гюнеш Абасава, Жанэт, «Лявоны», Аляксандра Гайдук. Пётр Елфiмаў, насуперак чаканням, заяўку не падаў). Свае кандыдатуры выставiлi, напрыклад, расiянка спявачка Проста Марыя, полька Малгажата Анджыеўская. Гавораць таксама пра заяўкi з боку Iспанii, Кiпра, Галандыi; выказвалi жаданне ўдзельнiчаць у беларускiм адборы прадстаўнiкi Партугалii i Iндыi. Зрэшты, як давалi раней зразумець прадстаўнiкi аргкамiтэту конкурсу, перавага ўсё ж будзе аддавацца беларускiм — як выканаўцам, так i аўтарам.

Фiнальны канцэрт i iнтэрактыўнае галасаванне гледачоў адбудуцца 10 лютага. Пасля вызначэння тройкi фаварытаў у работу зноў уключыцца прафесiйнае журы, якое пакiне толькi аднаго. Цi адну. Цi адзiн — калi пашанцуе гурту (памятаем толькi, што на сцэне «Еўрабачання» ўсё адно будзе не больш за 6 чалавек). I ўжо з iм (ёй, iмi) пачне працаваць i рыхтавацца да майскага выступлення цэлая каманда — аранжыроўшчыкi, стылiсты, мадэльеры... А мы, натхнёныя перамогай на дзiцячым «Еўрабачаннi», будзем спадзявацца на ўдачу.

ПОГЛЯД У БОК СУСЕДЗЯЎ

Украiнскi адбор на «Еўрабачанне» праходзiць у фармаце тэлешоу пад назвай «Ты — зорка». На дадзены момант вызначылiся 12 фiналiстаў, з якiмi ў Кiеве працуюць прафесiяналы. Першы адборачны канцэрт запланаваны на 28 студзеня. Пасля кожнага канцэрта тэлегледачы i журы будуць галасаваць, i тройка слабейшых выканаўцаў пакiне праект. У вынiку прыкладна 11 сакавiка застануцца трое лiдараў, з якiх i будзе выбраны пераможца. Пакуль што адным з найбольш верагодных прэтэндэнтаў лiчыцца даволi раскручаная ва Украiне спявачка Цiна Кароль.

Расiйскi Першы канал дагэтуль не абвясцiў аб пачатку прыёму заявак на адкрыты нацыянальны адбор на «Еўрабачанне-2006». Аднак некаторыя артысты ўжо выказалi жаданне ў iм паўдзельнiчаць. Сярод iх — Дзiма Бiлан, Варвара, дзявочы гурт з мiлiтарысцкiм iмiджам «Рамонкi», Жасмiн, дуэт колiшнiх выпускнiкоў «Фабрыкi зорак» Джэма i Алены Цярлеевай.

Дарэчы, з 2007 года Расiю на «Еўрабачаннi» будзе ў чаргаваннi з Першым каналам прадстаўляць таксама тэлеканал РТР (сёлета ён жа прадставiць краiну на дзiцячым «Еўрабачаннi»). Цi абазначае гэта, што i адбор удзельнiкаў будзе праходзiць адначасова або паралельна на двух каналах, пакуль невядома.