Пасля перамогi

Источник материала:

Ведай нашых!

Беларускiя баксёры нарэшце вярнулiся дамоў пасля свайго трыумфу над адной з мацнейшых каманд свету — ЗША. Праўда, амерыканцаў перамаглi не з такiм ужо вялiкiм адрывам — 5:4 i 4:3. Аднак не ўпусцiлi-такi вiкторыю са сваiх пальчатак. Карэспандэнту «Звязды» ўдалося дазванiцца аднаму з нашых баксёраў, сярэбранаму прызёру летнiх Алiмпiйскiх гульняў у Афiнах Вiктару ЗУЕВУ:

— З перамогай над амерыканцамi! Наколькi цяжка было змагацца на рынгу ў гасцях?

— Дзякуй за вашы вiншаваннi. Канешне, выходзiць на бой было складана з псiхалагiчнага пункту гледжання: трыбуны падтрымлiвалi сваiх землякоў. Аднак наша каманда змагла сабрацца i паказаць, на што здольна нават не на родным рынгу.

— Што стала галоўным стымулам: матч жа быў таварыскiм?

— У прынцыпе я настройваюся на перамогу перад кожным боем незалежна, якi ён, i iншыя спартсмены, мяркую, таксама.

— Як плануеце святкаваць перамогу? Камандай?

— Не. Паеду дамоў у Вiцебск, каб крыху адпачыць. Праўда, доўга гэта рабiць не ўдасца, бо хутка пачнецца чэмпiянат краiны, дзе патрэбна быць у форме.

— Дарэчы, хто першым павiншаваў у Амерыцы?

— Ужо не ўзгадаю. Аднак памятаю, што сярод iх быў i наш мiнiстр спорту Аляксандр Грыгараў (ён таксама ўзначальвае беларускую федэрацыю бокса).

— Дзякуй за гутарку! Поспехаў вам i надалей.