Сеем — значыць жывём!

Источник материала:

У Чэрыкаўскiм раёне, у аграгарадку Язёры адбылося традыцыйнае Свята першай баразны. Яго арганiзаваў сельскi Дом культуры, i гаспадынямi на iм былi Вясна i Мацi-зямля.

Кiраўнiк СПК «Язёрскi» Сяргей Мядзведзеў павiншаваў сялян з пачаткам веснавых палявых работ i сам атрымаў ад Мацi-зямлi сiмвалiчны каравай.

Ветэран працы Iван Пятровiч Кавалёў уручыў маладым механiзатарам шкатулку з зямлёй, як запавет берагчы i прымнажаць багацце, якое дае чалавеку родная зямля. Дзецi са школы i дзiцячага садка перадалi працаўнiкам гаспадаркi паштоўкi з вiншаваннямi.

Асноўная iдэя свята — гэта пераемнасць пакаленняў. Перад сялянамi выступiў Андрэй Васiльевiч Мядзведзеў — колiшнi старшыня калгаса i дзядзька цяперашняга кiраўнiка. У Мядзведзевых — цэлая дынастыя кiраўнiкоў: гэтым жа калгасам кiраваў яшчэ i дзед Сяргея Мядзведзева. Увогуле ў гаспадарцы шмат працоўных дынастый: «Язёрскi» не адчувае патрэбы ў спецыялiстах, а выхоўвае iх самастойна.

Напрыканцы Свята першай баразны перарэзалi чырвоную стужку i выпусцiлi ў поле шэсць трактароў, якiя пачалi ўносiць угнаеннi, арганiку. Жыхарам Язёраў спадабалася гэта добрае свята.