Калi пазваночнiк просiць паратунку

Источник материала:

— Хваробай стагоддзя сёння з’яўляецца астэахандроз. Гэта фактычнае старэнне храшчавой тканкi пазваночнiка. I з узростам такiя працэсы развiваюцца ў кожнага чалавека. Акрамя таго, развiццю хваробы можа спрыяць спадчыннасць, прафесiя (калi доўгi час даводзiцца працаваць у нязручных позах цi мець справу з цяжкiмi грузамi). Аднак галоўная прычына ўсё ж — працэсы звычайнага старэння.

У некаторых людзей астэахандроз працякае вельмi хваравiта, выклiкаючы болi ў спiне, паяснiчным аддзеле. Менавiта нiжнiя аддзелы пазванкоў прымаюць на сябе найбольшую нагрузку. Аднак пры астэахандрозе боль не пастаянны, а праходзячы. I часта тут дапамагае кансерватыўнае лячэнне.

Горш, калi астэахандрозу спадарожнiчае выпадзенне цi грыжа мiжпазванковых дыскаў. Зараз яна назiраецца даволi часта. Напрыклад, у ЗША з прычыны грыжы дыскаў у год робiцца каля 200 тысяч аперацый. У нас у разы менш. I справа не ў тым, што такiх хворых менш цi методыкi аперацый недасканалыя. А ў менталiтэце самога нашага чалавека: ён будзе лепш цярпець, пацiху наблiжаючыся да iнвалiднасцi. Я б не раiў iсцi такiм шляхам. Бо што такое грыжа дыска? Гэта калi мiжпазванковы храшч выпадае са свайго звычайнага месца ў канал i прыцiскае карашковыя спiнна-мазгавыя нервы, што выклiкае балявы сiндром. Калi выпаўшы дыск мае значныя аб’ёмы, яго назад ужо не ўправiць. Выйсце адно — выдаленне.

— А як жа расказы аб цудадзейнай моцы мануальнай тэрапii? Многiя людзi з такой «балячкай» спадзяюцца менавiта на яе.

— Мануальная тэрапiя можа ў нейкай ступенi дапамагчы, калi маюцца падвывiхi пазванкоў, маленькiх суставаў. Але калi выпаў вялiкi дыск, нi адзiн граматны мануальны тэрапеўт не возьмецца за яго ўпраўленне. А часцяком бывае так: чалавек называе сябе мануальшчыкам, нават не маючы вышэйшай медыцынскай адукацыi. Вось i пачынае ён, нягледзячы нi на што, бiць свайго пацыента па пазванках. I мы ведаем нямала выпадкаў, калi пасля такога «лячэння» людзi атрымлiвалi паталагiчныя пераломы пазваночнiка.

— Якiя методыкi прымяняе сучасная медыцына для лячэння грыжы мiжпазванковых дыскаў?

— У нас зараз маюцца вельмi вялiкiя дыягнастычныя магчымасцi. Мы робiм камп’ютарную тамаграфiю, магнiтарэзанансную тамаграфiю пазваночнiка. Гэтыя даследаваннi дазваляюць вельмi дакладна вызначыць сiтуацыю з праблемнымi месцамi ў пазваночнiку i выбраць правiльную тактыку лячэння.

Першы час праводзiцца кансерватыўнае лячэнне: прымяняюцца разнастайныя разгрузкi на пазваночнiк, выцяжэннi, блакады i г.д. Але калi боль не праходзіць i даследаваннi паказваюць, што дыск выпаў амаль увесь, трэба рабiць аперацыю.

Сучасная мiкрахiрургiя дыска праводзiцца на вельмi высокiм узроўнi. Калi раней для таго, каб дастаць дыск, пры такiх аперацыях рабiўся разрэз у 10—15 см, то зараз мы накладваем адно маленькае шво ў 2 см. Вы- паўшыя дыскi выдаляюцца з дапамогай спецыяльных мiкрахiрургiчных iнструментаў, пад оптыкай.

Пасля аперацыi пацыент устае ўжо на наступны дзень, а некаторыя i ў канцы аперацыйнага дня. Раней жа людзi знаходзiлiся ў ложку 2—3 тыднi. Штодзень у нашай клiнiцы праводзiцца 2—3 такiя аперацыi.

— Якiя прафiлактычныя меры варта прымаць, каб не пакутаваць ад болю ў спiне? I наколькi эфектыўныя розныя прыстасаваннi, якiя зараз рэкламуюцца ад хвароб пазваночнiка (паясы, касмадыскi i г.д.)?

— Гэтыя прыстасаваннi з’яўляюцца своеасаблiвымi фiзiяпрацэдурамi. Яны ўздзейнiчаюць на нервовыя канчаткi, могуць зняць ацёк, боль. Аднак такi эфект магчымы толькi тады, калi ў наяўнасцi ёсць астэахандроз. Пры вялiкай грыжы мiжпазванковых дыскаў гэта не дапаможа.

А ўвогуле дзеля здароўя пазваночнiка вельмi важна паболей рухацца, рабiць гiмнастыку, карысныя практыкаваннi на турнiку, калi вы завiсаеце на iм ва ўвесь рост. Пазваночнiк «любiць» таксама практыкаваннi, звязаныя з выгiнаннем, прагiнаннем.

Лепшая прафiлактыка хвароб пазваночнiка — плаванне. Летам паменей ляжыце на пляжы, а паболей плавайце ў моры, рацэ, возеры. А ў iншы час наведвайце басейн. Калi ж ваша спiна нагадала аб сабе болем, якi не праходзiць на працягу тыдня, трэба звяртацца да ўрача. Толькi спецыялiст прызначыць курс лячэння, дапаможа распрацаваць iндывiдуальны гiмнастычны комплекс.

Гутарыла Вольга ШАЎКО.