Самую гуманную арганiзацыю папоўняць журналiсты?

Источник материала:

Зараз членамi самай аўтарытэтнай арганiзацыi ў галiне аховы здароўя з’яўляецца прыкладна 1 мiльён беларусаў, але ў блiжэйшай будучынi людзей з актыўнай дабрачыннай пазiцыяй павiнна стаць больш. Калi «пярвiчкi» Чырвонага Крыжа ёсць у навучальных установах, на прадпрыемствах розных формаў уласнасцi, то чаму б iм не з’явiцца, напрыклад, у Савеце Мiнiстраў, Адмiнiстрацыi прэзiдэнта, Акадэмii навук, iншых значных дзяржаўных структурах i арганiзацыях, а таксама ў сродках масавай iнфармацыi? Такую думку агучыла Людмiла Пастаялка i падтрымала ў дачыненнi да СМI Лiлiя Ананiч.

Паводле слоў старшынi Беларускага Чырвонага Крыжа Людмiлы Пастаялка, «гуманiтарныя прынцыпы павiнны ўвайсцi ў нашы сэрца i душу». Разлiчваць толькi на мiжнароднае спонсарства сёння немагчыма, паколькi скiравана яно пераважна на падрыхтоўку спецыялiстаў у гуманiтарнай галiне. Мяркуецца, што далей канкрэтнай краiне застаецца самастойна выпрацаваць стратэгiю дзеянняў i адшукаць магчымасцi фiнансавання.

Зараз Беларускi Чырвоны Крыж рэалiзуе, напрыклад, Чарнобыльскую праграму гуманiтарнай дапамогi i рэабiлiтацыi. У забруджаных раёнах аказваецца медыцынская i псiхалагiчная падтрымка, з дапамогай перасоўных дыягнастычных лабараторый наладжана абследаванне насельнiцтва, а дзецi, хворыя на рак шчытападобнай залозы, атрымлiваюць неабходныя медыкаменты. Дарэчы, iрландскi ўрад вылучыў 500 тысяч еўра для працягу падобнай работы ў блiжэйшыя тры гады.

Чырвоны Крыж — гэта i медыка-сацыяльная дапамога адзiнокiм састарэлым грамадзянам на даму, i фармiраванне прадуктовых, гiгiенiчных набораў для шматдзетных, маламаёмных сем’яў, i дапамога пацярпелым падчас стыхiйных бедстваў, бежанцам, ахвярам гандлю людзьмi i iншае.

У Беларусi толькi звыш 30 тысяч чалавек маюць патрэбу проста ў штодзённым доглядзе. На думку Людмiлы Пастаялка, Дамоў мiласэрнасцi павiнна быць больш, паколькi ў дадзеным выпадку гаворка iдзе аб пастаянным, дасканалым доглядзе, што нерэальна забяспечыць у межах звычайных сацыяльных службаў. Бездапаможныя перад старасцю, адзiнотай, беднасцю, хваробамi людзi маюць патрэбу ў падтрымцы i спачуваннi больш моцнай часткi грамадства. На гэта патрэбны вялiкiя сiлы i грошы. Менавiта таму Беларускi Чырвоны Крыж з’яўляецца адной з самых масавых гуманных арганiзацый, шэрагi якой няспынна растуць.