Бясплатныя пуцёўкi на аздараўленне — толькi ў айчынныя санаторыi

Источник материала:

Пытальнiк

М.Н. ВАРАБЕЙ, Навасёлкi-1 Пастаўскага раёна

Каб даць адказ на пытанне чытачкi, мы мусiлi звярнуцца ў Вiцебскае абласное ўпраўленне Рэспублiканскага цэнтра па аздараўленню i санаторна-курортнаму лячэнню насельнiцтва. Як высветлiлася, яго начальнiк Алена Андрэйкава добра памятае нашу заяўнiцу, паколькi тая сапраўды звярталася з пытаннем адносна выдзялення дачцэ пуцёўкi на аздараўленне да мора. Тым не менш Алена Барысаўна яшчэ раз агучыла адказ.

Справа ў тым, што пуцёўкi, якiя выдзяляюцца па лiнii Рэспублiканскага цэнтра па аздараўленню i санаторна-курортнаму лячэнню насельнiцтва, датычацца толькi айчынных аздараўленчых устаноў. Iншымi словамi, нi дзiця, нi дарослы атрымаць пуцёўку да мора не можа (для мацi i дзiцяцi бываюць пуцёўкi ў Мiсхор, аднак яны выдзяляюцца па iншай лiнii). Так што, заўважыла Алена Андрэйкава, адмоўлена заяўнiцы было цалкам на законных падставах. «У IV квартале дачцэ жанчыны, як i было абяцана раней, будзе выдзелена бясплатная пуцёўка ў адзiн з беларускiх санаторыяў з улiкам профiля захворвання». Што датычыца заўвагi нашай чытачкi адносна таго, што зiмой дзяўчыне пуцёўка не трэба... Як дадала Алена Барысаўна, у блiжэйшай перспектыве плануецца вырашыць пытанне аб прадастаўленнi такiх iльготных пуцёвак на аздараўленне выключна на мiжсезонны перыяд. Iншымi словамi, набыць пуцёўку на летнiя месяцы можна будзе толькi за грошы, бясплатныя ж будуць выдавацца, напрыклад, на той жа зiмовы перыяд. Мяркуецца, што такая норма ўступiць у сiлу ўжо з 1 студзеня 2007 года — пасля падпiсання кiраўнiком дзяржавы адпаведнага ўказа.