Мiкалай ДАМАШКЕВIЧ: «Моладзь, стварайце сем’i i нараджайце дзяцей!»

Источник материала:

I невыпадкова, што ў Год Мацi непасрэдна перад Днём Мацi менавiта на Мiншчыне з’явiўся Музей Мацi, дарэчы, адзiны на сёння ў Беларусi. Да заканчэння 2006 года засталося крыху больш за два месяцы, i таму можна падводзiць вынiкi. А яны сведчаць аб тым, што цэнтральная вобласць трымае самы высокi ў краiне ўзровень сацыяльнай абароны i падтрымкi сям’i. Уся дзейнасць накiраваная на тое, каб бацькi i iх дзецi адчувалi ўпэўненасць у жыццi. Як расказаў карэспандэнту «Звязды» старшыня Мiнскага абласнога выканаўчага камiтэта Мiкалай ДАМАШКЕВIЧ, галоўная праблема шматдзетных бацькоў, i ў гэтым нiякага сакрэту няма, у тым, каб забяспечыць сваю сям’ю жыллём.

— У гэтым годзе мы ажыццявiлi абследаванне матэрыяльнага стану i ўзроўню жыцця ўсiх шматдзетных сем’яў вобласцi. Высветлiлася, што iм неабходная дапамога мясцовых уладаў для паляпшэння жыллёвых умоў, а таксама ў набыццi бытавых рэчаў для дома — халадзiльнiка, напрыклад, — кажа Мiкалай Дамашкевiч. — Дробныя праблемы, кшталту дзiцячага адзення, сем’i ўжо могуць вырашаць самастойна. Дабрабыт па прычыне росту прыбыткаў паляпшаецца.

Аднак гэта не значыць, што дзяржава не будзе дапамагаць у вырашэннi вялiкiх пытанняў. Да канца гэтага года плануецца палепшыць жыллёвыя ўмовы 352 шматдзетных сем’яў Мiнскай вобласцi. А гэта 35,2 тысячы новых квадратных метраў. Галоўная крынiца для будаўнiцтва кватэр для жыхароў Мiншчыны — льготныя крэдыты i субсiдыi для насельнiцтва менавiта за кошт рэсурсаў ААБ «Беларусбанк». Карэспандэнт газеты спытаў у старшынi праўлення «Беларусбанка» Надзеi ЕРМАКОВАЙ, цi ёсць цяжкасцi ў шматдзетных сем’яў вобласцi ў атрыманнi крэдыту на жыллё.

— Я запэўнiваю ў тым, што ААБ «Беларусбанк» выдае кожнай шматдзетнай жадаючай сям’i крэдыты для будаўнiцтва без усялякiх праблем. Можа, цяжкасцi i ўзнiкаюць, але яны звязаныя з юрыдычнымi пытаннямi: некаторыя пакуль не ведаюць, як праходзiць афармленне ўсiх неабходных дакументаў. Але я думаю, гэта невялiкая праблема, якая з цягам часу вырашыцца. А крэдытаў нашай установы хопiць для кожнай сям’i.

— Вы з’яўляецеся i старшынёй грамадскага аб’яднання «Беларускi саюз жанчын». З пункту гледжання кiраўнiка гэтай арганiзацыi ацанiце ўзровень сацыяльнай абароны, дапамогi ўсiм сем’ям, i шматдзетным бацькам, у прыватнасцi, на Мiншчыне.

— Ужо сам факт, што менавiта ў Салiгорску з’явiўся Музей Мацi, гаворыць аб тым, што ў вобласцi наладжана работа самым лепшым чынам. I асаблiва прыемна казаць гэта непасрэдна перад святкаваннем Дня Мацi.

— У ААБ «Беларусбанк» працуюць шматдзетныя жанчыны?

— Канешне ж, як i ва ўсякай арганiзацыi. Мы ганарымся сваiмi матулямi, яны сапраўдныя гераiнi. I падтрымлiваем iх i перад пэўнымi святамi, i на працягу ўсяго года. Дапамагаем не толькi маральна, але i матэрыяльна. Напрыклад, кожнай з нашых жанчын, якая нарадзiла сёлета трэцяе дзiця, за кошт прыбыткаў банка адкрыты рахунак на мiльён рублёў. Такiх дзяцей у нас у гэтым годзе ўжо 57.

Дарэчы, у падтрымцы сем’яў, i не толькi шматдзетных, бачыцца выйсце з дэмаграфiчнай праблемы ў нашай краiне. Паводле слоў намеснiка мiнiстра працы i сацыяльнай абароны Валерыя ПАЎЛАВА, сiтуацыя з нараджальнасцю ўжо не крытычная, але праблема прыросту насельнiцтва пакуль застаецца. «Праграма дэмаграфiчнай бяспекi распрацавана, i ў самы блiжэйшы час яна будзе прадстаўлена ў органы ўлады для разгляду i прыняцця, — паведамiў Валерый Паўлаў. — Мэта яе ў тым, каб дзяржава падтрымлiвала людзей, дапамагала iм у выхаваннi дзяцей. Згодна са сваiм зместам, праграма дазволiць вырашыць частку матэрыяльных праблем сем’яў, якiя выхоўваюць або збiраюцца завесцi дзiця: плануецца павялiчыць дзяржаўную дапамогу, зрабiць больш выгаднымi крэдыты».

Са свайго боку Мiнская вобласць робiць усё для таго, каб зацiкавiць моладзь у стварэннi сям’i i нараджэннi дзяцей. Пры павелiчэннi бюджэту (выдаткi на сацыяльныя патрэбы насельнiцтва вобласцi кожны год павялiчваюцца на пяць працэнтаў) Мiнаблвыканкам мае магчымасць дапамагчы маладой сям’i. На думку Мiкалая Дамашкевiча, моладзь не жадае ствараць уласную сям’ю i заводзiць дзяцей з-за няўпэўненасцi ў матэрыяльным становiшчы i зноў жа з-за адсутнасцi ўласнага жылля.

— Аднак гэтыя праблемы толькi на першы погляд здаюцца невырашальнымi. Я магу сказаць, ды вы i самi бачыце, што заработная плата ў вобласцi павялiчваецца, у гарадах i раёнах Мiншчыны актыўна будуюцца новыя дамы. Дарэчы, зараз у вобласці патрэбны будаўнікі і спецыялісты ў галіне сельскай гаспадаркі. Малады чалавек, якi прыязджае працаваць у сельскую мясцовасць, атрымлiвае кватэру. Чаму ж тады не заводзiць сям’ю? Паведамляю таксама, што зараз мы распрацоўваем новыя рашэннi па падтрымцы моладзi. Асноўная iдэя заключана ў тым, што малады спецыялiст, якi прыязджае працаваць у раён, адразу ж атрымлiвае службовую кватэру, а праз пяць-сем гадоў, калi гэты спецыялiст застанецца на тым жа месцы, жыллё становiцца яго ўласнасцю, — патлумачыў губернатар. — Я звяртаюся да моладзi — стварайце добрую, любячую сям’ю, нараджайце дзяцей. Гэта ж найвялiкшае шчасце ў жыццi! А ўсё астатняе вырашыцца!

Дзмiтрый АЛЬФЕР,

Салiгорск—Мiнск.