Зладзеi ў выгнаннi

Источник материала:

Канферэнц-зала

Як адзначыў падчас сустрэчы з журналiстамi намеснiк начальнiка Галоўнага ўпраўлення па барацьбе з арганiзаванай злачыннасцю i карупцыяй МУС Уладзiмiр Цiхiня, лiдары крымiнальнай супольнасцi нават свае сустрэчы не праводзяць на тэрыторыi Беларусi. Паводле яго слоў, апошняя «зладзейская сходка» была ў нашай краiне дзесьцi гадоў 8 таму. Тады ў Беларусi пражывалi 4 «зладзеi ў законе». Праўда, як падкрэслiў прадстаўнiк МУС, усе яны былi грамадзянамi Расii i iншых дзяржаў СНД. У хуткiм часе гэтыя няпрошаныя госцi, не без дапамогi праваахоўных органаў нашай краiны, вымушаны былi iмiгрыраваць. Такiм чынам, як паведамiў Уладзiмiр Цiхiня, зараз у Беларусi няма нiводнага ўладальнiка зладзейскай «кароны». Аднак гэта не сведчыць пра аўтаматычнае знiкненне арганiзаванай злачыннасцi. Зусiм выкаранiць гэтую з’яву праваахоўным органам не ўдалося. Хоць, паводле слоў Уладзiмiра Цiхiнi, колькасць арганiзаваных злачынных груповак з кожным годам змяншаецца. I прычына не толькi ў жорсткiм прэсiнгу з боку «сiлавых» структур.

Намеснiк кiраўнiка «антымафiёзнага» ўпраўлення падкрэслiў, што ў Беларусi няма эканамiчнай асновы для росквiту «зладзейскага руху». Паводле яго слоў, у нашай краiне таксама не адбылося «зрошчвання» крымiналу i ўлады. Часам, праўда, назiраюцца асобныя кантакты прадстаўнiкоў мясцовых уладаў i злачынных «аўтарытэтаў». Уладзiмiр Цiхiня паведамiў, напрыклад, што адзiн з дэпутатаў Гомельскага гарсавета «заплямiў» сябе сувяззю з «марозаўскай» злачыннай групоўкай.

Нагадаю, што гэтая злачынная арганiзацыя дзейнiчала ў Гомельскай вобласцi з 1991 па 2004 год. На яе рахунку больш за 100 цяжкiх i асаблiва цяжкiх злачынстваў, у тым лiку забойствы 18 чалавек. «Народны выбраннiк», якi кантактаваў са злачынцамi, дарэчы, быў затрыманы ў Польшчы.

Увогуле супрацоўнiцтва беларускiх барацьбiтоў з арганiзаванай злачыннасцю з замежнымi калегамi даволi плённае. Паводле слоў намеснiка начальнiка Галоўнага ўпраўлення папярэдняга расследавання МУС Сяргея Мiгаленi, хутчэй i лягчэй айчынныя мiлiцыянеры знаходзяць агульную мову з прадстаўнiкамi праваахоўных органаў краiн СНД, Балтыi i Польшчы. Усталёўваюцца цесныя кантакты беларускiх «антымафiёзных» падраздзяленняў з адпаведнымi структурамi краiн Цэнтральнай Еўропы. Днямi ў Мiнску адбыўся мiжнародны семiнар, падчас якога больш за 40 прадстаўнiкоў праваахоўных органаў дзяржаў — удзельнiц Цэнтральна-Еўрапейскай Iнiцыятывы абмеркавалi актуальныя праблемы процiдзеяння транснацыянальнай злачыннасцi.