Зацiкаўленасць у павелiчэннi ўзаемнага гандлю

Источник материала:

Куба, аўтарытэтны член Руху недалучэння, з’яўляецца адным з асноўных гандлёвых партнёраў Беларусi ў Лацiнскай Амерыцы. Тавараабарот у студзенi—вераснi 2006 года ў параўнаннi з адпаведным перыядам мiнулага года вырас на 23,6 працэнта. Беларусь пастаўляе на Кубу прадукцыю машынабудаўнiчага комплексу — грузавыя аўтамабiлi, трактары, рухавiкi, кар’ерныя самазвалы, кузавы для аўтамабiляў, запчасткi, а таксама шыны. Галоўны тавар кубiнскага iмпарту —цукар.

У час работы камiсii ўдалося прааналiзаваць ход выканання рашэнняў папярэдняга пасяджэння, падвесцi вынiкi гандлёва-эканамiчнага супрацоўнiцтва за мiнулы год, намецiць накiрункi яго актывiзацыi на будучыню. Парадак дня пасяджэння ўключаў i абмеркаванне пытанняў двухбаковага ўзаемадзеяння па лiнii мiнiстэрстваў прамысловасцi, сельскай гаспадаркi i харчавання, канцэрнаў «Белнафтахiм» i «Беллегпрам», Беларускай гандлёва-прамысловай палаты, Мiнскага авiярамонтнага завода.

Былi таксама разгледжаны пытаннi фiнансавага i мiжбанкаўскага супрацоўнiцтва i наладжвання прамых кантактаў з беларускiмi экспарцёрамi.

Адным з перспектыўных накiрункаў развiцця эканамiчных сувязяў з’яўляецца медыка-фармацэўтычная i бiялагiчная прамысловасць. Таму размова партнёраў iшла i аб стварэннi ў Беларусi сумеснага прадпрыемства па выпуску вакцын i iмунабiялагiчных прэпаратаў. Таксама былi прадоўжаны перамовы наконт стварэння на Кубе зборачных вытворчасцяў па выпуску трактароў i паўпрычэпаў.