Гарачая кава, загар i алкаголь павялiчваюць «шанцы» раку

Источник материала:

36,6°

Штогод у Беларусi рэгiструецца 37 тысяч выпадкаў раку з упершыню выяўленым дыягназам. А ў структуры агульнай смяротнасцi беларусаў анкалагiчныя захворваннi займаюць стабiльна другое месца ўслед за паталогiяй сардэчна-сасудзiстай сiстэмы (13,1 працэнта). На думку анколагаў, прыкладна трэцюю частку анкалагiчных захворванняў можна было б папярэдзiць. Дастаткова сказаць, што ў нашай краiне кожны трэцi хворы на рак з’яўляецца курцом, а курэнне абумоўлiвае да 30 працэнтаў анкалагiчнай паталогii. Сярод iншых фактараў, якiя правакуюць развiццё злаякасных пухлiн, «лiдзiруюць» асаблiвасцi харчавання (35 працэнтаў), iнфекцыйныя агенты (10 працэнтаў), прафесiйныя канцэрагены (4—5 працэнтаў), а таксама ўльтрафiялетавае выпраменьванне, злоўжыванне спiртнымi напоямi, дрэнная экалогiя, рэпрадуктыўныя фактары i нiзкая фiзiчная актыўнасць. Напрыклад, чалавек з залiшняй вагой цела мае большую рызыку «займець» анкалогiю, чым той, хто сочыць за лiшнiмi сантыметрамi на талii — справа ў тым, што тлушчавыя клеткi назапашваюць больш як 45 канцэрагенаў. Вельмi небяспечная ў анкалагiчным плане таксама любоў да празмерна гарачай ежы, якая правакуе развiццё раку страўнiка i стрававода.

Анкалагiчныя захворваннi органаў жаночай палавой сферы спецыялiсты звязваюць з гарманальнымi парушэннямi, узроставымi фактарамi, iнфiцыраваннем вiрусам папiломы чалавека, збоямi ў iмуннай сiстэме, хранiчнымi стрэсамi, атлусценнем, наяўнасцю фонавых захворванняў, нерэалiзаванай рэпрадуктыўнай функцыяй i наяўнасцю спадчыннай схiльнасцi да ракавых захворванняў. Так, рак малочнай залозы, выяўлены ў двух пакаленнях адной сям’i (у бабулi i мацi), на 50 працэнтаў павялiчвае рызыку займець падобныя праблемы i ва ўнучкi. Дарэчы, у жанчын злаякасныя захворваннi органаў рэпрадуктыўнай сiстэмы займаюць каля 50 працэнтаў сярод выяўляемых выпадкаў раку. Найбольш часта выяўляецца рак малочнай залозы — 17,6 працэнта ад агульнай колькасцi, цела маткi — 7,6 працэнта, шыйкi маткi — 4,8 працэнта i яечнiкаў — 4,4 працэнта. Паводле слоў кiраўнiка аддзела анкагематалогii НДI анкалогii i медыцынскай радыялогii Iрыны Касенка, сёння рак цела маткi стаў праблемай нумар адзiн для многiх краiн свету, у тым лiку i для Беларусi. Так, за перыяд з 1972 па 2005 год захворваемасць на рак гэтай лакалiзацыi вырасла ў нашай краiне больш чым у пяць разоў. Зараз пiк захворваемасцi прыпадае на ўзроставую групу ад 45 да 47 гадоў...

Адна з галоўных складовых паспяховага лячэння раку — гэта выяўленне яго на пачатковых стадыях. Медыкi сцвярджаюць, што лячэнне раку на першай i другой стадыях гарантуе чалавеку захаванне жыцця. Але многiя з хворых, якiм патрабуецца спецыялiзаваная медыцынская дапамога, элементарна баяцца пачуць свой дыягназ, таму i адцягваюць да апошняга свой вiзiт да ўрача. Магчыма, анколагам трэба часцей гаварыць услых аб тым, што рак больш не з’яўляецца невылечнай хваробай. Так, дзякуючы мерам, што прадпрымалiся рэспублiканскай анкалагiчнай службай, пачынаючы з 70-х гадоў удалося захаваць жыццё 196 тысячам чалавек. Больш за палову з гэтай колькасцi пацыентаў пераадолелi тэрмiн у пяць гадоў. Лiчыцца, што праз пяць гадоў пасля праведзенага лячэння хвароба павiнна канчаткова адступiць ад чалавека...