Вiктар МАРАХIН: «Цана продажу акцый «Белтрансгаза» з’яўляецца прымальнай для Беларусi»

Источник материала:

Пра беларуска-расiйскi эканамiчны канфлiкт карэспандэнт «Звязды» гутарыць з намеснiкам старшынi Камiсii па бюджэту, фiнансах i падатковай палiтыцы Палаты прадстаўнiкоў Нацыянальнага сходу Вiктарам МАРАХIНЫМ.

— Як вы ацэньваеце дасягнутае ў апошнiя хвiлiны 2006 года (па маскоўскаму часу) пагадненне аб пастаўках расiйскага газу ў Беларусь?

— Мы мелi мiжурадавае пагадненне аб адзiных тарыфах на газ. I кошт газу павiнен быў падняцца не больш чым на 15 працэнтаў. Аднак, паколькi «Газпрам» прад’явiў ультыматум, а таксама для таго, каб не парушаць пастаўку газу iншым спажыўцам, Беларусь была вымушана прыняць умовы «Газпрама». Прычым гэтыя ўмовы iшлi сумесна з умовамi пастаўкi сырой нафты для Беларусi. Вырашэнне гэтых пытанняў, напэўна, было ўзаемазвязана. I таму Беларусь пайшла на падпiсанне дастаткова нявыгадных для сабе ўмоў.

— Як вы ацэньваеце тое, што 50 працэнтаў акцый «Белтрансгаза» будзе набыта «Газпрамам»?

— Думаю, цана продажу акцый «Белтрансгаза» з’яўляецца прымальнай для Беларусi. Пра цану ў 5 млрд долараў ЗША мы гаварылi адразу. Расiя ж спачатку гаварыла пра 800 млн, потым пра 1 млрд 200 млн. Аднак незалежныя эксперты ацанiлi «Белтрансгаз» у 5 млрд. Гэта значыць наша цана была пацверджана.

Станоўчае ў пагадненнi памiж беларускiм i расiйскiм бакамi тое, што яно падпiсана не на год, а на чатыры гады. I да 2011 года мы павiнны выйсцi на сусветныя цэны на газ. I мы будзем планаваць пераход, вырашаць звязаныя з iм пытаннi. Хоць зараз павышэнне кошту газу прымушае ўрад прымаць рашучыя меры, каб сацыяльныя артыкулы бюджэту не пацярпелi.

— Нягледзячы на дасягенне пагаднення аб пастаўках газу, сiтуацыя ў беларуска-расiйскiх эканамiчных адносiнах у першыя днi 2007 года складваецца вельмi праблематычная. 3 студзеня беларускi ўрад абвясцiў аб уводзе пошлiн на расiйскую нафту, якая iдзе праз тэрыторыю краiны на Захад. Як вы ацэньваеце такi крок?

— Гэта мера ў адказ на ўвядзенне Расiяй мытных пошлiн на нафту, экспартуемую ў Беларусь. Гэта адэкватныя дзеяннi беларускага ўрада. Я лiчу, што гэта цалкам нармальная мера i пасля выхадных у Расii, пасля 8 студзеня, памiж бакамi пачнуцца сур’ёзныя перамовы. I па дадзенай праблеме будзе знойдзены кампрамiс.

— Цi пагадзiцца, на ваш погляд, Расiя на раздзел экспартных пошлiн на пастаўляемую ў Беларусь нафту? Якiм можа быць гэты падзел?

— Прагноз рабiць не буду. Але я ўпэўнены, што Расiя i Беларусь прыйдуць да кампрамiснага рашэння, якое будзе задавальняць абодва бакi.