Дапамажыце пазваночнiку

 — Мiкалай Пятрэнка з Гомеля. Зараз рэкламуецца мноства розных партатыўных электранейрастымулятараў, якiя абяцаюць пазбавiць ад радыкулiту, люмбага i г.д. Як вы, Арнольд Фёдаравiч, ставiцеся да гэтых прыбораў?

— Перад iх выкарыстаннем патрэбна кансультацыя спецыялiста-неўролага, якi можа сказаць, патрэбен гэты прыбор цi не. Бо сярод гэтых сродкаў ёсць i вельмi эфектыўныя i такiя, ад якiх няма нiякай карысцi.

 — Нэла Iванаўна, тэлефаную з Мiнска. Скажыце, як не стаць ахвярай бiзнэсу на пазванках? Чым рызыкуе чалавек, давяраючы сваю спiну мануальнаму тэрапеўту?

— Мануальная тэрапiя можа ў нейкай ступенi дапамагчы, калi маюцца падвывiхi маленькiх суставаў пазванкоў. А калi выпаў вялiкi дыск, нiводзiн адукаваны мануальны тэрапеўт не возьмецца за яго ўпраўлянне. А часцяком бывае так: чалавек называе сябе мануальшчыкам, нават не маючы вышэйшай медыцынскай адукацыi, i пачынае бiць свайго пацыента па пазванках. I мы ведаем нямала выпадкаў, калi пасля такога «лячэння» людзi атрымлiвалi паталагiчныя пераломы пазваночнiка.

 — Георгiй Жалтоў з Мiнска. Якiя прафiлактычныя меры варта прымаць, каб не мучыцца ад боляў у спiне?

— Усё вельмi проста: весцi здаровы лад жыцця, займацца фiзкультурай, адпаведна ўзросту размяркоўваць фiзiчныя нагрузкi.

 — Я чула, што ў вашым цэнтры распрацаваны i прымяняюцца новыя аперацыйныя методыкi для лячэння астэахандрозу пазваночнiка. У чым iх сутнасць? Надзея Пятроўна. Горацкi раён.

— Дзякуючы гэтым методыкам аб’ёмы хiрургiчнага ўмяшання зведзены да мiнiмуму. Робiцца маленькi разрэз не больш за два сантыметры, накладваецца толькi адно шво. Хворыя пасля гэтай аперацыi ўстаюць нават да вечара.

 — Добры дзень! Вас патурбавала Зiнаiда Васiльеўна са Стоўбцаў. Мне паставiлi дыягназ — астэапiнiя i сказалi, што з такiм захворваннем ёсць пагроза развiцця астэапарозу. Тры гады таму выдалiлi шчытападобную i парашчытападобную залозы. Як можна эфектыўна палячыцца ў дадзеным выпадку?

— Пры такiм захворваннi паказана кансерватыўнае лячэнне, звязанае з правiльным прызначэннем гармонаў. Звярнiцеся да эндакрынолага, каб праверыць гарманальны фон i правiльна падабраць прэпараты, якiя давядзецца ўжываць працяглы час. Iнакш, сапраўды, можа развiцца астэапароз — вымыванне соляў кальцыю з коснай тканкi.

— Я прымаю кальцый-Д3-нiкамед.

— Правiльна робiце. Але акрамя гэтага, вам пастаянна трэба знаходзiцца пад наглядам эндакрынолага i выконваць яго парады. Калi адчуеце, што вынiку ад лячэння няма, прасiце накiраванне ў абласны эндакрыналагiчны дыспансэр.

 — Уладзiмiр Уладзiмiравiч са Слуцка... Мне 58 гадоў, маю нiзкую згусальнасць крывi. Таму хачу запытаць, цi можна мне лячыць пазванковую грыжу без аперацыi?

— А вы ведаеце прычыну гэтай вашай асаблiвасцi?

— Не ведаю, на жаль.

— Значыць, у першую чаргу неабходна звярнуцца да гематолага, у Мiнскую абласную бальнiцу, дзе вам дапамогуць адкарэгiраваць згусальнасць крывi. Што датычыцца грыжы, то вам павiнны зрабiць камп’ютарную або магнiтную рэзанансную тамаграфiю пазваночнiка... У вас нага балiць?

— Раней боль аддаваў у нагу, зараз — не.

— Калi нага не балiць, аперацыя вам наогул не паказана. Проста лячыцеся ў неўролага.

— Рэкамендавалi рабiць кампрэсы з настоек акопнiка, напрыклад...

— Некаторым гэта не дапамагае, але паспрабаваць можна.

«Прамую лiнiю» правялi Святлана БАРЫСЕНКА i Вольга ШАЎКО.

(Працяг будзе.)