Ваўкi «расперазалiся»...

Источник материала:

Ляснiк ранкам адкрыў дзверы хаты, каб адправiцца на работу, а ў двары, бачыць, стаiць прыгажуня-казуля. I, здаецца, нiколькi не баiцца яго. Так працягвалася хвiлiну-паўтары, пасля чаго казуля, азiраючыся, пацiхеньку накiравалася з двара. Вопытны ў лясной справе гаспадар адразу ж сцямiў, што не па сваёй волi яна прыходзiла да яго ў госцi, а нешта ж прымусiла яе рашыцца на такi крок. Што цi хто? Пэўна, якi драпежнiк.

Так яно потым i аказалася, калi ён агледзеў наваколле i выявiў на снезе воўчыя сляды. Шэрых разбойнiкаў тут было двое. Яны гналi казулю, якая вялiкiмi скачкамi ўцякала ад iх i сваё выратаванне знайшла ў падворку Смыкоўскага, куды ваўкi пабаялiся забегчы.

Адносна гэтага факта я гутарыў з галоўным ляснiчым спецлясгаса Дзмiтрыем Касакевiчам i начальнiкам аддзела аховы i абароны лесу i паляўнiчай гаспадаркi Гомельскага абласнога лесагаспадарчага аб’яднання Вячаславам Рогалем. Яны расказалi, што сёлетнi паляўнiчы сезон (а ён яшчэ на ваўкоў не закончыўся) у Нараўлянскiм раёне здабыта 18 ваўкоў. Прычым за апошнi тыдзень — 6, а ў мiнулую пятнiцу — 4 адразу. Летась ад стрэлаў паляўнiчых загiнула 30 драпежнiкаў, а за пяць апошнiх гадоў — 130, па вобласцi ж за ўказаны перыяд — каля 300.

На мiнулым тыднi сем ваўкоў, аб’яднаўшыся ў зграю, аблажылi статак дзiкоў. Тыя, ратуючыся, кiнулiся наўцёкi i, перабягаючы рэчку Славечну, трапiлi ў палонку. Гэта ўбачыла паляўнiчая брыгада са спецлясгаса i Палескага дзяржаўнага радыяцыйна-экалагiчнага запаведнiка. Яна прыйшла на дапамогу вепрукам, якiя (такое цяжка i ўявiць сабе) хапалiся зубамi за вяроўкi, каб iх выцягнулi. Для чатырох кабаноў усё закончылася добра, а вось шасцёра, нягледзячы на ўсе паўтарагадзiнныя стараннi людзей, пайшлi пад лёд.

А крыху раней паляўнiчыя натрапiлi на дзвюх толькi што разадраных ваўкамi казуль. Пайшлi па слядах драпежнiкаў — i на два з iх стала менш. У палескiх раёнах развялося гэтых «лясных санiтараў» столькi, што яны ўяўляюць вялiкую пагрозу не толькi для жывёлы, але i для чалавека. Ужо былi неаднаразовыя напады iх на людзей. Таму патрэбна ўзмацнiць адстрэл шэрых разбойнiкаў, што, вядома ж, няпроста.