Людзi ў масках

Источник материала:

Акцыя

Яе ўдзельнiкам можа стаць кожны, каму цiкава хадзiць у музей не толькi ў вызначаныя раскладам гадзiны. Наш галоўны музей гатовы адчынiць дзверы нават ноччу — такiм чынам ён далучаецца да шырокага святкавання Дня музеяў у свеце. Сёлета а восьмай гадзiне вечара i да апоўначы Нацыянальны мастацкi музей ладзiць карнавал. I ўсё дзеля таго, каб паказаць, што сучасны музей можа быць розным — жывым, здольным мяняць аблiчча i нават быць загадкавым. Таму, хто апране маску, зробленую сваiмi рукамi, абяцаны бясплатны бiлет. Лепшая маска карнавалу атрымае спецыяльны падарунак з рук дырэктара музея Уладзiмiра Пракапцова.

Карнавал абяцае быць гучным. У фае будзе гучаць джаз ад «Chiefs band», нiбыта рыхтуючы прысутных да выставы ў жанры ню — «Чары ночы» ад Сяргея Цiмохава. У новым корпусе тым часам развернецца папулярны дзi-джэй Pasha Pioneer». Пазней яго зменяць прадстаўнiкi школы баявых мастацтваў «Тайпiнь». Самыя стойкiя дачакаюцца адкрыцця выставы масак фантастычных персанажаў.

Калi ўсе маскi будуць скiнутыя, музей будзе падлiчваць рэальныя вынiкi акцыi. Яны, напэўна, станоўчыя, калi акцыя праводзiцца трэцi раз.

Дзяржаўны музей гiсторыi тэатральнай i музычнай культуры адчыняе свае дзверы ў рамках мiжнароднай акцыi чацвёрты раз. Сёлета акрамя экспазiцыi наведвальнiкi могуць стаць сведкамi цiкавых музычных iмпрэзаў. А 19-й гадзiне цудоўныя гукi «Чароўнай флейты» Моцарта патрывожаць залу. Калаж оперы падрыхтавалi студэнты Беларускай акадэмii музыкi, удзельнiкi мiжнароднага праекта «Маладыя галасы». Праз паўтары гадзiны пачнецца канцэрт старадаўняй музыкi ў выкананнi «Мiнскiх камерных салiстаў».