Абзац

* Некалькi слуцкiх паясоў з фондаў Дзяржаўнага гiстарычнага музея ў Маскве, магчыма, будуць перададзеныя на пастаянную экспазiцыю ў Нацыянальны музей гiсторыi i культуры Беларусi, паведамiў начальнiк упраўлення па ахове гiсторыка-культурнай спадчыны i рэстаўрацыi Мiнiстэрства культуры нашай краiны Васiль Абламскi. Аб гэтым ёсць канкрэтныя дамоўленасцi з расiйскiм бокам. У нашых музеях няма гэтай найвялiкшай гiстарычнай i культурнай каштоўнасцi Беларусi, мiж тым у расiйскiм музеi 20 знаходзiцца ў экспазiцыi i больш за 40 — у запаснiках.

* Вядомы паэт-песеннiк Мiхаiл Танiч памёр на 85-м годзе жыцця ў рэанiмацыi Боткiнскай бальнiцы ў Маскве. Ён быў сааўтарам хiтоў "Чорны кот", "Ідзе салдат па горадзе", "Калi мае сябры са мной" i многiх iншых.

* Двое маладых людзей пацярпелi ў Мiнску ў вынiку сутыкнення скутара з аўтобусам. ДТЗ адбылося на вулiцы Матусевiча. Падчас язды на скутары хлопцы размаўлялi памiж сабой, прычым вадзiцель павярнуў галаву назад i не заўважыў аўтобус, якi стаяў на прыпынку. Скутар ехаў, па словах вiдавочцаў, з хуткасцю прыкладна 60 км/гадз i на поўным ходзе ўрэзаўся ў аўтобус. Пацярпелыя дастаўленыя ў бальнiцу, адзiн з iх, вадзiцель, моцна ўдарыўся галавой i пашкодзiў трахею. Акрамя таго, у даведцы медыкаў запiсана, што маладыя людзi былi п’яныя. Наперадзе — экспертыза.

* Балгарская кампанiя "Л-Клас" вымушаная будзе даплацiць у бюджэт Беларусi падаткаў на суму амаль Br242 млн. Падатковыя плацяжы даналiчаныя па вынiках праверкi, праведзенай супрацоўнiкамi дзяржкантролю i Мiнiстэрства па падатках i зборах па Вiцебскай вобласцi. Як устаноўлена падчас праверкi, на працягу 2006 года балгарскае прадпрыемства працавала без пастаноўкi на ўлiк у падатковым органе i такiм чынам ухiлiлася ад уплаты падаткаў. Акрамя таго, кампанii давядзецца выплацiць штраф амаль у Br34 млн.

* На дарозе паблiзу вёскi Чабаi Валожынскага раёна з прыметамi наезду аўтамабiля было знойдзена цела невядомага мужчыны, якi, мiж iншым, быў абазначаны флiкерам. Тэрмiнова ўведзены праваахоўнiкамi ў 8 раёнах Мiнскай i 4 раёнах Гродзенскай вобласцi план "Перахват", на жаль, вынiкаў не прынёс: па гарачых слядах вiнаватага ў наездзе аўтааматара затрымаць не ўдалося. Што ж датычыцца загiнулага, то яго асобу ўстанавiлi хутка: высветлiлася, што гэта раней неаднаразова судзiмы за крадзяжы 30-гадовы мужчына, якi адбываў пакаранне ў папраўчай установе адкрытага тыпу ў Валожыне. Як мяркуецца, напярэдаднi здарэння зняволены вырашыў дома адсвяткаваць сваё 30-годдзе.

* Учора ранiцай падчас урока англiйскай мовы ў сярэдняй школе кiргiзскага горада Ош памiж дзвюма вучанiцамi 11-га класа адбылася бойка, у вынiку якой адна са школьнiц загiнула. Настаўнiца не змагла разняць дзяўчат, якiя пабiлiся. Прычынай смерцi стаў удар аб парту, пасля якога дзяўчына страцiла прытомнасць. Медыкi, якiя прыбылi на месца трагедыi праз 15 хвiлiн, канстатавалi смерць.

* Група даследчыкаў з Нарвегii ўстанавiла, што людзi з павышаным артэрыяльным цiскам намнога радзей церпяць ад мiгрэняў, чым тыя, у каго цiск у норме. Прааналiзаваўшы стан здароўя ў 50 тыс. пацыентаў, яны прыйшлi да высновы, што гiпертонiкi церпяць ад галаўнога болю на 40 працэнтаў радзей, чым пацыенты з нармальным цiскам. Даследчыкi лiчаць, што павышаны артэрыяльны цiск робiць сценкi артэрый больш жорсткiмi, панiжаючы адчувальнасць да болю.

Поўны абзац

* На разгляд парламенту Фiнляндыi паступiў законапраект, у рамках якога фiнскiя працаўнiкi змогуць атрымлiваць тыдзень адпачынку "па каханню", каб праводзiць яго са сваiмi сем’ямi цi каханымi. Мэта закона — знiжэнне высокага ўзроўню разводаў у краiне. З такой iнiцыятывай выступiў член Сацыяльна-дэмакратычнай партыi, акцёр i паэт Томi Таберман.