Калгасная царква

Источник материала:

У Вiшове Бялынiцкага раёна ўрачыста адкрылi i асвяцiлi праваслаўную царкву ў гонар Святых апосталаў Пятра i Паўла. У мiнулую нядзелю ў Вiшоўскай царкве прайшлi першыя вянчанне маладых i хрышчэнне дзiцяцi.

— Царква вельмi патрэбна нашаму калгасу, — не мае сумненняў кiраўнiк "Радзiмы" Аляксандр Лапацентаў. — Мы дбаем не толькi пра вытворчыя паказчыкi, але i духоўнае жыццё людзей. У нядзелю, калi ў Вiшоў прыязджае святар, у царкве столькi народу, што не прапiхнуцца! І асаблiва ўдзячныя старыя людзi, у якiх цяпер ёсць магчымасць адвесцi душу ў храме. Вiшоўская царква — гэта гордасць "Радзiмы" i яе працаўнiкоў. Вяскоўцы хваляцца, што храм пабудаваны вельмi акуратна i з густам. Абразы новай царкве падарылi мастакi, святары i мясцовыя вернiкi. Вiшоўскiя жанчыны асвойваюць майстэрства пеўчых. Для дзяцей пры храме адкрыецца нядзельная школа.

Епiскап Магiлёўскi i Мсцiслаўскi Сафронiй, якi асвяцiў новую царкву, уручыў ордэн Беларускай праваслаўнай царквы iмя Кiрылы Тураўскага Аляксандру Лапацентаву. Дарэчы, грамату за ўклад у будаўнiцтва праваслаўнай царквы атрымаў калгасны энергетык Мiкалай Капялюш, якi па веравызнаннi — католiк, але разам з калегамi падтрымлiвае iдэю зблiжэння хрысцiянскiх цэркваў.