Фотафакт. Фэст народнага гумару ў Аўцюках

Источник материала:

8-9 жніўня ў вёсках Вялікія і Малыя Аўцюкі (Калінкавіцкі раён, Гомельская вобласць) адбыўся шосты ўсебеларускі фестываль народнага гумару.

Як паведаміў БелаПАН, у свяце ўзялі ўдзел творчыя калектывы з усіх абласцей Беларусі, а таксама з рэгіёнаў Украіны. Мерапрыемства праходзіць пад дэвізам "Хто гуляе i дурэе, той нiколi не старэе!".

8 жніўня ў вёсцы Малыя Аўцюкі адкрыўся помнік Каласку і Калінцы (так тут называюць мясцовых жыхароў). Вітаючы дэлегацыі, якія прыбылі на фестываль, вядучыя назвалі галоўнымі Каласкамі гомельскай зямлі старшыню Гомельскага аблвыканкама Аляксандра Якабсона і намесніка міністра культуры Віктара Кураша, а галоўнай Калінкай — дэпутата Палаты прадстаўнікоў Раісу Ціханскую.

На адкрыцці свята прадстаўнікам уладаў прапанавалі распілаваць бервяно — як залог таго, што праз два гады ў Аўцюках будзе пабудаваны і адкрыты музей народнага гумару. Бервяно распілавалі піламі пад назвай "Цешчын язык". Плануецца, што музей народнага гумару будзе пабудаваны пры ўдзеле ўкраінскіх спонсараў.

Усебеларускі фестываль гумару праводзіцца ў Аўцюках з 1995 года па ініцыятыве старшыні Беларускага дзіцячага фонду пісьменніка У.Ліпскага. Асаблівасць гэтых вёсак у тым, што Вялікія Аўцюкі па тэрыторыі і насельніцтве меншыя за Малыя Аўцюкі.