На Мiншчыне выселена 33 сям’i неплацельшчыкаў ...З iх 9 — без выдзялення жылля

Источник материала:

Паводле апошнiх звестак, агульная сума пратэрмiнаванай запазычанасцi жыхароў па аплаце за кватэру ў Мiнскай вобласцi склала больш за 4 мiльярды рублёў. Гэта 5,9 працэнта агульнай колькасцi "жыровак". Як заўважыў у гутарцы з карэспандэнтам "Звязды" намеснiк генеральнага дырэктара Мiнскага абласнога ўнiтарнага прадпрыемства "Упраўленне жыллёва-камунальнай гаспадаркi" Павел Пархоменка, з пачатку года адпаведны паказчык зменшыўся амаль удвая.

Дапамаглi даволi жорсткiя захады па спагнаннi запазычанасцi. Паводле слоў Паўла Пархоменкi, было пададзена 1,8 тысячы выканаўчых лiстоў, 8,2 тыс. абанентам за даўгi адключалi камунальныя паслугi (у першую чаргу гаворка iдзе пра халодную i гарачую ваду). Адзiн з захадаў уздзеяння — iскавыя заявы. Сёлета ў суд iх было накiравана 5,6 тысячы, на высяленне пададзена 56 iскаў.

Сёлета на Мiншчыне сваiх кватэр пазбавiлiся 33 сям’i жыхароў-парушальнiкаў. 24 з iх былi пераселены ў жылыя памяшканнi меншай плошчы з горшымi спажывецкiмi якасцямi. А 9 сем’яў увогуле выселiлi без выдзялення жылля. Як заўважыў Павел Пархоменка, гэта магчыма ў адпаведнасцi з 39 артыкулам Жыллёвага кодэксу. Да адпаведнай меры звяртаюцца ў тым выпадку, калi "наймальнiк, члены яго сям’i, iншыя асобы, што жывуць разам, сiстэматычна разбураюць цi псуюць жылое памяшканне, альбо выкарыстоўваюць яго не па прызначэннi альбо сiстэматычным парушэннем правiлаў карыстання жылля робяць немагчымым пражыванне iншых з iмi ў адной кватэры цi ў доме". Калi захады ўздзеяння аказалiся безвынiковымi, такiя жыхары ў прамым сэнсе слова аказваюцца на вулiцы.