Рыгор Барадулін выдаў кнігу дзіцячых вершаў
8 января 2009 Культура
Арцём Багданаў, Польскае радыё для замежжа У менскім выдавецтве “Радыёла-плюс” выйшла кніжка дзіцячых вершаў народнага паэта Беларусі Рыгора Барадуліна “Выпаў грук у грома з рук”. Тут сабраныя як дзіцячыя вершы мінулых гадоў, гэтак і сёньняшнія вершы Барадуліна для маленькіх, дзе зьяўляюцца такія сучасныя рэаліі, як інтэрнэт, мабільнік, ролікі Пра кніжку распавядае яе выдавец Уладзімер Сіўчыкаў. У.Сіўчыкаў: Гэта ня першая кніжка Барадуліна для дзетак - такія кнігі ўжо выходзілі і ў “Юнацтве”, і ў іншых выдавецтвах. І калі я дазнаўся, што ў адным зь дзяржаўных выдавецтваў нават ня некалькі месяцаў, а некалькі гадоў ляжыць рукапіс для дашкольнікаў і малодшых школьнікаў, то з радасьцю прапанаваў перакінуць яго да нас. Так і сталася. Кніжка пад назваю “Выпаў грук у грома з рук” і падзагалоўкам “Вершы, загадкі, лапатушкі, цьвялілкі, бубнілкі, пацешкі чакаюць усьмешкі” якраз днямі пабачыла сьвет. А вось гэтыя ўсе жанры, якія прыведзеныя ў падзагалоўку, - гэта арыгінальныя прыдумкі дзядзькі Рыгора? У.Сіўчыкаў: Мне здаецца, што ў большасьці - так. Можа быць, “загадкі” і “пацешкі” можна сустрэць дзе яшчэ. А ўсе гэтыя “бубнілкі” і “цьвялілкі” - я ня чуў, каб нехта называў свае вершы так. Спадар Уладзімер, наколькі я разумею, у гэтую кніжку ўвайшлі ня толькі вершы дзядькі Рыгора для дзяцей, але й вершы іншых паэтаў, перакладзеныя Барадуліным? У.Сіўчыкаў: Кніжка сапраўды складаецца з двух разьдзелаў. У першым - уласна аўтарскія, барадулінскія рэчы. А ў другім - ізноў жа, барадулінскія, але гэта, хутчэй, не пераклады зь іншых моваў, а перасьпевы, адвольныя пераказы. Вось, да прыкладу, адна з рэчаў Яна Бжэхвы “Лятучая карова”, як вы можаце здагадацца, пра карову, якая хацела лятаць: Аблокі ела ля небакраю, Удосыць насыціўшыся, сказала: “Ня птушкай - кароваю быць жадаю” - І тут жа долу ціхутка ўпала. Вы скажаце, што нясу несусьвецьце? А я распавёў, як здарэнне хацела. Бо ведаю: у жаўруковым павеце Карова была, што лётаць умела. Вось гэткім чынам лятучая карова з аднайменнага верша польскага клясыка Яна Бжэхвы загаварыла па-беларуску. Распавесьці пра ўласныя вершы для дзяцей я папрасіў самога Рыгора Барадуліна. Дзядзька Рыгор, скажыце, адкуль пасьля “сур’ёзных” кніжак вашых вершаў узялася гэтая кніга для дзяцей? Р.Барадулін: Разумееце, я неяк увесь час паралельна займаўся дзіцячымі вершамі. Да таго, як мяне перасталі выдаваць у дзяржаўных выдавецтвах, у мяне многа выходзіла дзіцячых кніжак. А цяпер дайшло да таго, што калі ў так званым “новым” Саюзе пісьменьнікаў пералічалі дзіцячых паэтаў, дык мяне нібыта і няма А я нават рады, што мяне няма ў той кампаніі!.. Я змалку любіў казкі, якія слухаў ад мамы. І вершамі сваімі я практычна гадаваў і дачку, і ўнучку - па сямейнай службе ў мяне дзіцячыя вершы!.. (усьміхаецца) Дзядзька Рыгор, а ці не было складана Вам прыстасавацца да сучасных рэаліяў і напісаць вершы пра мабільнік, інтэрнэт, ролікі? Р.Барадулін: Акружаны такімі абставінамі, што воляю-няволяй будзеш падпарадкоўвацца сучаснасьці. Таму што ня толькі ж пісаць пра лапці ды аборы А ці пішуцца Вам дзіцячыя вершы цяпер? Р.Барадулін: Патроху парой прыходзяць у галаву На заканчэньне прапаную вам верш Рыгора Барадуліна “Павуціньне” зь ягонай новай кнігі ў аўтарскім выкананьні. Р.Барадулін (чытае): Ёсьць павук, нябачны, быццам сон, Павуцінаю няўлоўны ён. Абвівае шар зямны з імпэтам. Той павук завецца інтэрнэтам. Што было, што ёсьць, Што будзе ў сьвеце - Зьвесткі ёсьць пра ўсё ў інтэрнэце. З дому не выходзячы нікуды Можаш слухаць птушак, быццам цуды. Ні пяра ня трэба, ні паперы Сябру ліст прыслаць. Нячутна ў дзьверы Грукнецца нябачны пашталён, Ліст у той жа міг уручыць ён. Слухай інтэрнэт, чытай, пішы - Але й сам мазгамі варушы! Чтобы разместить новость на сайте или в блоге скопируйте код:
На вашем ресурсе это будет выглядеть так
8 января 2009 Культура Арцём Багданаў, Польскае радыё для замежжа У менскім выдавецтве “Радыёла-плюс” выйшла кніжка дзіцячых вершаў народнага паэта Беларусі Рыгора Барадуліна “Выпаў грук у грома з рук”. Тут сабраныя як дзіцячыя вершы мінулых гадоў, гэтак і сёньняшнія вершы Барадуліна для маленькіх, дзе зьяўляюцца...
|
|