Усё лепшае — сэрцу
Усё лепшае — сэрцу
Карысныя падказкi падчас "прамой лiнii" далi загадчык iнфарктнага аддзялення № 2 10-й мiнскай гарадской клiнiчнай бальнiцы Наталля ПАЛЯЎКОВА i ўрач-кардыёлаг блока iнтэнсiўнай тэрапii таго ж аддзялення Ірына ГРЫШЫНА. (Працяг. Пачатак у нумары за 21 лютага.) — Якi ў вас артэрыяльны цiск? — Нiзкi. 100/60 у гэты момант. Самы высокi — 150/100. — Вы абследавалiся дзе-небудзь? — Не. — А як вы вызначылi, што гэта экстрасiсталы? — Выклiкала "хуткую", яе работнiкi i сказалi... Параiлi звярнуцца да кардыёлага ў Салiгорску. Але ж туды не трапiць. Да таго ж, як трапiць менавiта падчас экстрасiсталаў? Мне дактары "хуткай" лiдакаiн уколюць, i ўсё нармальна. А цяпер я i сама навучылася лiдакаiн калоць... — Што вы, так нельга! Плюс гэтай сiтуацыi ў тым, што вашы экстрасiсталы ў спакоi не такiя небяспечныя, як экстрасiсталы падчас фiзiчнай нагрузкi. Вам трэба прыехаць да кардыёлага i абследавацца, знайсцi прычыну экстрасiсталаў. Або гэта пачатак гiпертанiчнай хваробы, або пачатак гарманальнай перабудовы, або трэба мець на ўвазе запаленчы працэс, якi калiсьцi вы перанеслi на нагах, напрыклад, ангiну. Трэба ведаць i ўзровень вашага халестэрыну. Норма — менш за 5,2 ммоль/л. Прычым нават калi гэты паказчык у норме, трэба даследаваць i "добры", i "дрэнны" халестэрын, iх суадносiны. Гэты аналiз называецца лiпiдаграма. Варта зрабiць сутачную кардыяграму — холтэраўскае манiтарыраванне. Можна пад’ехаць у Мiнск дзеля гэтага. Давядзецца абследавацца i ў гiнеколага, i ў эндакрынолага. Запiшыцеся, калi ласка, да кардыёлага, а там вам падкажуць, што трэба зрабiць. I паболей ужывайце садавiны-гароднiны. Вiтамiны i мiнералы, якiя там утрымлiваюцца, абараняюць сэрца. ( — Вольга Андрэеўна, Ляхавiчы. Перанесла тры iнфаркты мiякарда. Апошнi — у 2007 годзе. Што мне трэба прымаць? Пiла маначынкве, метапралол, амладзiпiн, эналапрыл. — Зараз прымаеце маначынкве? — Так. — Пасля перанесенага iнфаркту вы павiнны пажыццёва прымаць метапралол або iншыя прэпараты гэтай групы. Акрамя таго, вам патрэбны аспiрын, або палакард, або кардыямагнiл. Гэта — прафiлактыка паўторных iнфарктаў мiякарда. А маначынкве — прэпарат супраць узнiкнення стэнакардыi i iшэмii мiякарда. — Яна ў мяне ёсць. Летась была яшчэ арытмiя. — Калi вы цэлы дзень не будзеце працаваць фiзiчна, у вас не будзе нiякай фiзiчнай нагрузкi, то можна зрабiць перапынак у прыёме прэпарата. А калi вам трэба схадзiць у краму або ў вас высокi цiск у нейкi дзень, то трэба ўжываць маначынкве або iншы нiтрат. Працягвайце прымаць прэпараты, каб цiск не ўзнiмаўся вышэй за 140. Абмяжуйце колькасць солi ў рацыёне, яна затрымлiвае ваду ў арганiзме. ( — Заслаўе, Валянцiна Iванаўна. 56 гадоў. Хацелася б даведацца пра гiпертрафiю левага жалудачка... Пакутую ад гiпертанii... — Напэўна, у вашым выпадку гiпертрафiя — вынiк павышанага цiску. Падчас гiпертрафii павялiчваюцца самi клеткi сардэчнай мышцы, становяцца непаўнацэннымi. Патаўшчэнне сардэчнай мышцы можа прывесцi ў будучым да арытмii. Сэрца будзе непаўнацэнна качаць кроў. Трэба глядзець ступень гiпертрафii на ўльтрагуку i прымаць адпаведныя — для папярэджання павышэння цiску i гiпертрафii — лекi. Да iх адносяцца iнгiбiтары АПФ — эналапрыл, лiзiнапрыл, перындапрыл i iнш., — i бэта-блакатары — метапралол, бiсапралол, небiвалол. Пры рэгулярным прыёме гэтых прэпаратаў сэрца змяншаецца ў памерах. — А норваск? — Добры прэпарат. Ён змяншае цiск i тым самым перашкаджае гiпертрафii. — А прэдуктал? — Ён дапамагае клеткам, прымаецца курсамi. Толькi калi няма супрацьпаказанняў. Трэба iмкнуцца двойчы на дзень мераць цiск, i прыйсцi з гэтымi звесткамi да доктара, якi i падбярэ прэпараты. ( — Дзятлаўскi раён, Сяргей Сцяпанавiч. 67 гадоў. Цiск пасля ночы — 182/110, увечары — 140/90. Вага — каля 100 кг. Прымаю лiзiнапрыл, дыгаксiн, мелдранат. Але ж цiск усё роўна скача... — Дыгаксiн — гэта прэпарат, якi прызначаецца пры мерцальнай арытмii. Значыць, у вас ёсць нейкае перанесенае захворванне — iшэмiя, iнфаркт, арытмiя... Проста так ён не прызначаецца... У дачыненнi да лiзiнапрылу трэба карэктаваць дозу... Наогул чым небяспечны начны цiск? Тым, што ўсе катастрофы — мазгавыя i сардэчныя — часцей здараюцца ў ранiшнiя гадзiны. Таму мы i кажам, што цiск трэба кантраляваць ранiцай i ўвечары. Калi вечарам ён невысокi, а ранiцай узнiмаецца, то на ноч усё роўна трэба прымаць адпаведны прэпарат. Дозу таго ж лiзiнапрылу можна павялiчваць да 40 мг у суткi: 20 мг ранiцай i 20 мг вечарам, паколькi прэпарат дзейнiчае на працягу 12 гадзiн. Другi момант — павышаная вага. Прымаць лiзiнапрыл пры павышанай вазе — нядрэнна, паколькi ў такiм выпадку пакутуе печань. Гэты ж прэпарат выводзiцца ныркамi, а значыць, не аказвае пабочнага ўздзеяння на перагружаную печань. Раю вам зноў падысцi да доктара для правядзення карэкцыi лячэння. ( — Слонiм, Барыс Канстанцiнавiч. З-за атэрасклерозу сасудаў паставiлi электракардыястымулятар. Неабходна кантраляваць халестэрын. Каб ён не павялiчваўся, п’ю стацiны. Але яны дрэнна ўздзейнiчаюць на ныркi. Якiм арганiчным прэпаратам можна стрымлiваць халестэрын ад павелiчэння i праз якi час стацiны выводзяцца з арганiзма? — Стацiны больш дзейнiчаюць на печань, чым на ныркi. У першую чаргу ў вас павiнна быць здаровае харчаванне, з вялiкiм утрыманнем гароднiны — не меней за 400 г у дзень, паменей ежы жывёльнага паходжання. Прызначэнне стацiнаў кантралюецца бiяхiмiчным аналiзам крывi, у якiм вызначаюцца ферменты печанi. Калi назiраецца перавышэнне ў 1,5-2 разы, то стацiны адмяняюць. Печань жа трэба абараняць ужываннем усё той жа гароднiны i садавiны, якiя ўтрымлiваюць належныя вiтамiны i мiкраэлементы, а таксама клятчатку, якая будзе выводзiць халестэрын з арганiзма... Стацiны, дарэчы, маюць прыроднае i сiнтэтычнае паходжанне. Першыя стацiны, як вядома, вырабiлi з грыбоў... Для знiжэння ўзроўню халестэрыну можна ўжываць 150 г чырвонага вiна — у iм шмат флаваноiдаў. Можна купiць i дадаваць у супы, кашы клятчатку, якая таксама спрыяе вывядзенню халестэрыну з арганiзма. Акрамя таго, добра выводзяць з арганiзма i таксiны, i стацiны зефiр, мармелад, марская капуста, баклажаны, кабачкi. Карысна ўжываць марскую рыбу i морапрадукты, iльняны i iншыя нерафiнаваныя алеi. I вельмi важна культываваць станоўчыя эмоцыi. Нават калi чалавек будзе вытрымлiваць дыету, мець добры халестэрын, але будзе ў стане стрэсу, то можа атрымаць iнфаркт мiякарда. ( — Маладзечна, Iрына Казiмiраўна. 30 гадоў. Якiя прычыны выклiкаюць парок сэрца ў дзiцяцi? Якiя абследаваннi трэба прайсцi, каб гэта не паўтарылася з iншым дзiцем? — Па-першае, трэба навучыцца пазбягаць стрэсаў. Па-другое, сцерагчыся вiрусных iнфекцый, а калi захварэлi, то добра iх лячыць, не пераносiць на нагах. Неабходна весцi здаровы лад жыцця, рыхтавацца да цяжарнасцi, не знаходзiцца сярод курцоў. Пасiўнае курэнне — такi ж небяспечны фактар, як i актыўнае. Трэба прайсцi генетычнае абследаванне. ( — Ганна Рыгораўна, 68 гадоў. Капыльскi раён. Цукровы дыябет 2-га тыпу даў ускладненне на сэрца, з’явiлiся прыступы стэнакардыi. Прымаю карвiтол, лiзiнапрыл, верашпiрон... — Калi прыступы захоўваюцца, то перад фiзiчнай нагрузкай да гэтага лячэння неабходна дадаць нiтраты працяглага дзеяння — манасан, маначынкве, алекард i iнш. Для папярэджвання прыступаў стэнакардыi насiце з сабой нiтраты кароткага дзеяння — нiтраглiцэрын, лепей у выглядзе спрэю, каб хутка купiраваць прыступ. Неабходна ведаць яшчэ ўзровень халестэрыну, i дадаць прэпараты для знiжэння апошняга. Святлана БАРЫСЕНКА, Вольга ШАЎКО. (Працяг будзе.)
Чтобы разместить новость на сайте или в блоге скопируйте код:
На вашем ресурсе это будет выглядеть так
Карысныя падказкi падчас "прамой лiнii" далi загадчык iнфарктнага аддзялення № 2 10-й мiнскай гарадской клiнiчнай бальнiцы Наталля ПАЛЯЎКОВА
|
|