І конь i вершнiк — маладзенькiя

Источник материала:

Гонар Беларусi

Завяршыўся сёмы квалiфiкацыйны этап Кубка свету па конным трохбор'i, якi праходзiў пад Мiнскам, у пасёлку Ратамка на базе Рэспублiканскага цэнтра алiмпiйскай падрыхтоўкi ў мiнулыя выхадныя. Пераможцам спаборнiцтваў стаў беларус Iлья Анiсiн.

Тое, што зусiм юны выхаванец цэнтра алiмпiйскай падрыхтоўкi па конным спорце абыйшоў больш спрактыкаваных ды масцiтых супернiкаў, стала прыемнай нечаканасцю як для шматлiкiх гледачоў, так i для самога спартсмена. Найскладанейшы крос на так званых палявых выпрабаваннях Iлья з жарабцом Арбатам прайшлi выдатна. А вось на канкуры крышачку падкачалi i зарабiлi 8 штрафных. Iх блiжэйшыя супернiкi лiтовец Аiсцiс Вiткаўскас на канi Акс Галопес з 16 штрафнымi ачкамi занялi другое месца. Бронзавым прызёрам стаў расiянiн Аляксандр Маркаў з канём Пауль фом Гау.

Наш пераможца Iлья Анiсiн займаецца ў заслужанага трэнера Савецкага Саюза Сяргея Мухiна, якi прыехаў да нас з Расii, трэнiруе беларускiх трохборцаў. На мiжнароднай арэне, па словах дзяржаўнага трэнера Беларусi па конным спорце Наталлi Юранавай, Iлью заўважылi як таленавiтага, перспектыўнага спартсмена. У недалёкай будучынi восенню Iлью чакаюць чэмпiянат Еўропы сярод юнакоў i фiнал этапа Кубка свету. Пакуль яшчэ не вырашана, куды паедзе.

На жаль, фаварыт беларускай зборнай Вячаслаў Пойта выбыў з турнiру. Палявыя выпрабаваннi, найскладанейшы маршрут пашкодзiлi здароўе коней, на якiх ён выступаў. Эфiёп i Абсалют не прайшлi ветэрынарную iнспекцыю перад канкурам. Дарэчы, падчас кросу са спаборнiцтваў выбылi 10 удзельнiкаў. Адна з прычын — найскладанейшая траса. Гэты факт падкрэслiў i Марцiн Плева, прэзiдэнт гранд-журы Мiжнароднай федэрацыi коннага спорту, старшыня галоўнай судзейскай калегii турнiру. Гэта самая складаная траса для палявых выпрабаванняў з тых, якiя яму давялося бачыць у iншых краiнах, дзе праходзiць этап Кубка свету. Але, як падкрэслiў спадар Плева, яна поўнасцю адпавядае мiжнародным патрабаванням.

Былi надзеi на больш удалае выступленне ўдзельнiцы пекiнскай Алiмпiяды Алены Целяпушкiнай. Яна заняла толькi пяты радок у турнiрнай таблiцы. Прыкрая акалiчнасць здарылася яшчэ з адным з перспектыўных нашых удзельнiкаў. Аляксандр Зелянко вылецеў падчас кросу з сядла.

Увогуле, прадстаўнiкi судзейскай калегii адзначылi высокi ўзровень арганiзацыi гэтых спаборнiцтваў. Калi добра арганiзаваць рэкламную кампанiю, то можна будзе чакаць спартсменаў не толькi з Усходняй, але i Заходняй Еўропы, падкрэслiлi нашы госцi.