Ля вытокаў майстэрства

Источник материала:

У Дзяржаўным музеі гісторыі беларускай літаратуры праходзіць выстава вырабаў народных рамёстваў
У экспазіцыі можна пабачыць тканыя абрусы, ручнікі, пакрывалы і габелены, рэканструяваныя народныя касцюмы, якія насілі жыхары Гомельшчыны і Брэста. Прадстаўлены тут вырабы з керамікі, саломкі і дрэва, створаныя мастакамі, мадэльерамі, канструктарамі і вышывальшчыцамі прадпрыемства “Скарбніца”.
На выставе паказаны унікальныя работы таленавітых майстроў. Выбар месца для яе правядзення — Дзяржаўны музей гісторыі беларускай літаратуры — не выпадковы. Бо ля вытокаў нацыянальнай пісьмовай і вуснай творчасці ляжаць традыцыйныя фальклор і рамёствы, якія перадаюцца з пакалення ў пакаленне.
Арганізатары выказалі надзею, што экспазіцыя выкліча ў гледачоў цікавасць і падштурхне іх да авалодання сакрэтамі народных рамёстваў. Таму на выставе пройдуць майстар-класы па пляценні саломкі, вырабу паясоў і вышыўцы.
Да слова, навукова-эксперыментальная лабараторыя для вывучэння, адраджэння, захавання, развіцця і папулярызацыі беларускіх народных рамёстваў была створана ў краіне яшчэ ў 1976 годзе. Затым яна вырасла ў прадпрыемства “Скарбніца”. І вось сёння яго майстры працягваюць традыцыі продкаў.

Марат Гаравы