Альтэрнатыва ёсць! Нашы чытачы актыўна адгукнуліся на прапанову дадаць у спіс цудаў свае славутасці

Источник материала:

А яшчэ многія з нашых рэспандэнтаў — і сярод анкетуемых, і сярод наведвальнікаў нашага сайта www.ng.by — прапанавалі на званне ЦУД уласныя, часам нечаканыя аб’екты, якія не трапілі на старонкі нашага праекта. Сёння мы пазнаёмім вас з сямёркай аб’ектаў, якія, па вашых меркаваннях, заслугоўваюць асаблівай увагі.

Будынак гістарычнага факультэта БДУ ў Мінску. Спачатку мы здзівіліся: гэта што, чарговы жарт ад студэнтаў? Аказалася, будынак гістарычнага факультэта на вуліцы Чырвонаармейскай, 6 сапраўды можна назваць цудам. Гэта адзін з нямногіх будынкаў, якія захаваліся пасля Вялікай Айчыннай, у той час, калі сталіца літаральна ляжала ў руінах... Пабудаваны ў 1928—1931 гадах, будынак гістфака з’яўляецца гісторыка-культурнай каштоўнасцю трэцяй катэгорыі.

Помнік літары “Ў” у Полацку. Незвычайны помнік у старажытным горадзе нагадвае пра ўнікальную літару, якая сустракаецца толькі ў беларускім алфавіце.

Партызанскія зямлянкі каля вёскі Станькава Дзяржынскага раёна. Мабыць, гэта і сапраўды дзіва, што сёння, у мірны час “дзейнічае” партызанскі лагер. Канешне, гэта імітацыя, стварылі яго супрацоўнікі музея Вялікай Айчыннай вайны — але якраз на тым месцы, дзе калісьці размяшчаўся сапраўдны партызанскі лагер аднаго з атрадаў брыгады імя Ракасоўскага.

Накрышская Свята-Барысаглебская царква ў Дзятлаўскім раёне. Гэты цуд прапаноўвае наш чытач Юрый Рой: “Царква знаходзіцца на зямлі, пра якую шмат складзена легенд. Аб мінулым тут нагадвае многае: парослыя мохам дагістарычныя курганы і выдмы “Нёманскага мора”, старажытныя храмы і званіцы, рэшткі парка Стравінскіх і старадаўніх пабудоў, народныя легенды і аповеды старажылаў. Драўляная царква тут з’явілася прыкладна ў сярэдзіне XVI стагоддзя — гэта пацвярджае царкоўны архіў. Сучасны ж мураваны храм быў пабудаваны панамі  Стравінскімі ў 1821 годзе з бутавага каменю па ўнікальнай тэхналогіі.

Музей мытнага канфіскату ў Брэсце. Яго экспанаты —  прадметы мастацтва і антыкварыят, затрыманыя брэсцкімі мытнікамі пры спробе незаконнага вывазу за мяжу. Сярод экспанатаў — каштоўныя абразы XVI—XX стагоддзяў, туалетны набор з горнага хрусталю ў срэбнай аправе сусветна вядомай фірмы Фабержэ, кітайскія і японскія вазы ручной работы, марскія пейзажы Айвазоўскага... Агульны кошт экспазіцыі па самых сціплых падліках складае дзясяткі мільёнаў долараў.

Рэплеўскі касцёл у Ваўкавыскім раёне. Піша чытачка Святлана Нядвецкая: “Гэтая цудоўная пабудова, прыклад неагатычнага стылю ў архітэктуры, пабудавана з чырвонай цэглы і ўвенчана дзвюма вежамі вышынёй 10 м, якія сімвалізуюць чалавека з узнятымі да неба рукамі, які просіць Бога аб памілаванні. Найважнейшай каштоўнасцю касцёла з’яўляецца абраз Святога сямейства ХVI—XVII стагоддзяў, напісаны на тканіне”.

Гарадзішча Гарадок Баранавіцкага раёна. Чытачка Таццяна Кавальчук пераконвае нас, што гарадзішча культуры штрыхаванай керамікі, урочышча Гарадок — помнік археалогіі, які можна лічыць сапраўдным цудам. Знаходзіцца гарадзішча за 800 м на захад ад гарадскога пасёлка Гарадзішча на правым беразе ракі Сервеч.

Дарагія чытачы, калі ў вас таксама ёсць аб’екты, пра якія вам хочацца расказаць, — пішыце нам на адрас рэдакцыі ці пакідайце свае каментарыі на нашым сайце www.ng.by. Нам цікава ведаць ваша меркаванне!