«Няўдзелам у цырымоніі рэгістрацыі Лукашэнка паказаў, што ён не акцёр на выбарах, а рэжысёр»

Источник материала:

Рэгістрацыя ўсіх прэтэндэнтаў кандыдатамі ў прэзідэнты сведчыць пра тое, што ў Беларусі праходзіць лібералізацыя, але не дэмакратызацыя. Пра гэта ў інтэрв’ю БелаПАН заявіў палітолаг Юрый Чавусаў.

Юры Чавусаў, фота belsat.eu

Ён лічыць такі вынік чаканым.

«Гэта такая «шапка» працэсу лібералізацыі. Адносна свабоды прайшоў збор подпісаў, нечакана шмат ва ўчастковых камісіях прадстаўнікоў апазіцыі — цэлых 0,25% ад агульнай колькасці членаў, хаця на мінулых выбарах быў толькі адзін. Усіх зарэгістравалі.

Улада абяцала паказаць народу лібералізацыю — яна яе паказала», — сказаў Чавусаў.

Аднак, на яго думку, лібералізацыя не з’яўляецца дэмакратызацыя. «Улада дзейнічае па сцэнарыі парламенцкіх выбараў 2008 года.

Тады таксама была адносная свабода і рэгістрацыі, і агітацыі,

аднак у выніку мы атрымалі зусім стэрыльны парламент»,

— зазначыў Чавусаў.

Апазіцыйныя кандыдаты ў прэзідэнты, на думку Чавусава, «чаго хацелі, тое і атрымалі».

«Усе казалі, што яны збіраюцца данесці да народа сваю пазіцыю. У першую чаргу гэта тычыцца партыйных кандыдатаў — Яраслава Раманчука з Аб’яднанай грамадзянскай партыі, Рыгора Кастусёва з Партыі БНФ, Віталя Рымашэўскага з аргкамітэта па стварэнні партыі «Беларуская хрысціянская дэмакратыя», у нейкай меры — Мікалая Статкевіча, лідара аргкамітэта па стварэнні сацыял-дэмакратычнай партыі «Народная Грамада». Цяпер ім дадзена такая магчымасць. Пра што будуць гаварыць іншыя кандыдаты ў прэзідэнты, я не ведаю», — зазначыў Чавусаў.

Тым часам, на думку палітолага,

улада мае магчымасць зрабіць выбары максімальна падобнымі на выбары ў іншых краінах.

«У іншых краінах 10 кандыдатаў — гэта няшмат.

Адзінага кандыдата апазіцыя выбірае толькі пры жорсткай дыктатуры. Прэтэндэнтам даюцца пэўныя магчымасці — чым не лібералізацыя?» — зазначыў Чавусаў.

Аднак, на яго думку, вынікі выбараў прадказальныя. «Нездарма Лукашэнка не прысутнічаў на ўручэнні кандыдацкіх мандатаў.

Ён прадэманстраваў, што ён не акцёр на выбарах, а рэжысёр», — заключыў Чавусаў.