Раварыст у Ельску пабіўся з інспектарам ДАІ

Крымінальную справу пачалі на раварыста, які пабіўся з інспектарам ДАІ ў Ельску, інфармуе БЕЛТА са спасылкай на аддзяленне агітацыі і прапаганды ДАІ УУС Гомельскага аблвыканкама.

Здарэнне адбылося яшчэ 12 верасня. Інспектар ДАІ спыніў 50-гадовага раварыста, западозрыўшы, што той едзе п'яны. Мужчыну запрасілі ў машыну ДАІ, каб прайсці медагляд і скласці пратакол. Аднак раварыст, па словах супрацоўнікаў ДАІ, некалькі разоў стукнуў інспектара, прычыніўшы яму цялесныя пашкоджанні.

На парушальніка склалі пратакол за парушэнне Правілаў дарожнага руху. А 8 лістапада на чго пачалі крымінальную справу за супраціў супрацоўніку органаў унутраных спраў пры выкананні ім абавязкаў па ахове грамадскага парадку, спалучаны з ужываннем гвалту. Цяпер парушальніку пагражае да пяці гадоў абмежавання або пазбаўлення волі.