Тры мужчыны скралі пліту на вуліцы каля забаўляльнага комплексу ў Мінску

Мінская міліцыя выявіла трох чалавек, якія скралі кухонную пліту на вуліцы Янкі Купалы. 

26 чэрвеня кіраўніцтва аднаго з забаўляльных комплексаў Мінска па вуліцы Янкі Купалы звярнулася ў міліцыю. Яны паведамілі, што невядомая асоба скрала кухонную пліту, якая знаходзілася каля комплексу, паведамляе прэс-служба ГУУС Мінгарвыканкама.

Супрацоўнікі аддзела крымінальнага вышуку Цэнтральнага РУУС Мінска высветлілі, што злачынства ўчынілі мінчук і два жыхары Бабруйска. Трое маладых людзей ішлі па вуліцы Янкі Купалы і пабачылі пліту, якая стаяла каля будынку. Яны сталі рухаць пліту ў напрамку да аўтамабільнай стаянкі. Потым адзін з іх пад'ехаў на аўтамабілі, і пліту загрузілі ў багажнік. Праз некалькі хвілін мужчыны з'ехалі ў невядомым кірунку.

На маладых людзей пачалі крымінальную справу за крадзеж. Максімальнае пакаранне, якое ім пагражае, — да чатырох гадоў пазбаўлення волі.