Тэмп росту ВУП Беларусi ў 2010 годзе павiнен скласцi 111—113 працэнтаў

Источник материала:

Прэзiдэнт Беларусi Аляксандр Лукашэнка 7 снежня падпiсаў указ № 595 "Аб зацвярджэннi важнейшых параметраў прагнозу сацыяльна-эканамiчнага развiцця Рэспублiкi Беларусь на 2010 год".

Прадугледжваецца, што ў 2010 годзе ў параўнаннi з папярэднiм годам тэмп росту валавога ўнутранага прадукту будзе ў межах 111—113 працэнтаў, прадукцыi прамысловасцi — 110—112 працэнтаў, прадукцыi сельскай гаспадаркi — 110—111 працэнтаў, iнвестыцый у асноўны капiтал — 123—125 працэнтаў.

Прагназуецца, што ў 2010 годзе на экспарт будзе накiравана 52 працэнты прыросту вытворчасцi прамысловай прадукцыi.

З улiкам гэтага аб'ём знешняга гандлю таварамi i паслугамi павялiчыцца на 24—25 працэнтаў, у тым лiку экспарту — на 27—28 працэнтаў, iмпарту — на 20—21 працэнт.

Тэмп росту рэальнай заработнай платы ў 2010 годзе складзе 113—114 працэнтаў пры iндэксе спажывецкiх цэнаў 109—110 працэнтаў. Намiнальная налiчаная сярэднямесячная заработная плата па народнай гаспадарцы да канца 2010 года дасягне $500 у эквiваленце.

У цэлым заданнi па прагнозных параметрах на 2010 год устаноўлены з улiкам безумоўнага выканання рашэнняў трэцяга Усебеларускага народнага сходу i дасягнення асноўных паказчыкаў Праграмы сацыяльна-эканамiчнага развiцця Беларусi на 2006—2010 гады.

Указ уступае ў сiлу з 1 студзеня 2010 года за выключэннем асобных пунктаў.