Беларускi iнвестыцыйна-эканамiчны форум адкрыўся ў Мiнску

Источник материала:

Беларускi iнвестыцыйна-эканамiчны форум i шостае пленарнае пасяджэнне Кансультатыўнага савета па замежных iнвестыцыях пры Савеце Мiнiстраў Рэспублiкi Беларусь пачалi работу ў Мiнску.

Адкрыў форум прэм'ер-мiнiстр Беларусi, старшыня Кансультатыўнага савета па замежных iнвестыцыях Сяргей Сiдорскi.

Ён заявiў, што замежныя банкi давяраюць Беларусi.

"Мы выкарыстоўваем крэдытныя лiнii Германii, Італii, Кiтая. Германскае экспартнае крэдытнае агенцтва "Ойлер Гермес" на працягу гэтага года тройчы павялiчвала для Беларусi краiнавы лiмiт паручыцельстваў па экспартных крэдытах", — адзначыў прэм'ер-мiнiстр. Рашэнне аб павелiчэннi лiмiту прыняла iтальянская страхавая кампанiя "Сачэ". Беларусь таксама паспяхова супрацоўнiчае з сусветнымi фiнансавымi iнстытутамi. Ён таксама адзначыў плацежаздольнасць краiны па знешнiх фiнансавых абавязацельствах. Суверэнны крэдытны рэйтынг Беларусi ў лiпенi 2009 года пацверджаны рэйтынгавымi агенцтвамi Stаndаrd&Рооr's i Mооdу's Invеstоrs Sеrviсе.

Беспрацоўе ў Беларусi па вынiках 2009 года застанецца на дакрызiсным узроўнi i не перасягне 1-1,5 працэнта. Iнфляцыя ў Беларусi па вынiках 2009 года складзе не больш як 10,5 працэнта, што адпавядае калiдору, зададзенаму ў дакрызiсны перыяд.

У Беларусi захоўваюцца ўсе фактары, якiя ўплываюць на станоўчы iнвестыцыйны клiмат. "Нават ва ўмовах фiнансавага крызiсу мы не апускаемся ў эканамiчным развiццi i чакаем, што па вынiках гэтага года ВУП нашай краiны будзе не нiжэйшы за ўзровень 2008 года. Апошнiя 32 кварталы беларуская эканомiка забяспечвае дынамiчны рост", — сказаў Сяргей Сiдорскi.

Ён таксама падкрэслiў, што Беларусь у адрозненне ад многiх iншых краiн СНД не дапусцiла абвальнага падзення прамысловай вытворчасцi i па вынiках 2009 года па гэтаму паказчыку плануе выйсцi на ўзровень 2008 года.

У сферы рэгiстрацыi прадпрыемстваў Беларусь займае сёмае месца сярод 183 краiн, ахопленых аглядам Сусветнага банка. Для таго, каб адкрыць бiзнэс, дастаткова выканаць 5 працэдур, затрацiўшы на гэта 6 дзён, адзначыў прэм'ер-мiнiстр.

Сяргей Сiдорскi нагадаў аб Кодэксе аб зямлi, якi ўступiў у сiлу з 1  студзеня 2009 года, якiм замацаваны нормы, што прадугледжваюць магчымасць набыцця юрыдычнымi асобамi ўсiх формаў уласнасцi зямельных участкаў у прыватную ўласнасць. Гэты пытанне год таму вельмi непакоiла замежных iнвестараў, i яны задавалi яго на Лонданскiм iнвестфоруме. Цяпер яно вырашана.

Звяртаючыся да замежных iнвестараў, Сяргей Сiдорскi нагадаў аб пытаннi, што ўзнiкала ў iх раней наконт умяшання кантрольных органаў у работу бiзнэсу. Цяпер гэта пытанне вырашана: у Беларусi прыняты ўказ № 510 "Аб удасканаленнi кантрольнай (нагляднай) дзейнасцi ў Рэспублiцы Беларусь".

Беларусь да канца 2010 года плануе рэалiзаваць яшчэ 500 iнавацыйных праектаў. Гэта заводы па вытворчасцi аўтобусаў i чыгуначных вагонаў, гусенiчных трактароў i рухавiкоў.

Усяго ў рамках форуму замежным iнвестарам прапануецца прыняць удзел у рэалiзацыi амаль 100 iнвестыцыйных праектаў. Гэта прапановы беларускага ўрада на агульную суму каля $6 млрд. Праекты могуць быць рэалiзаваны на працягу блiжэйшых 2-3 гадоў.

Падатковая нагрузка на беларускую эканомiку ў 2010 годзе будзе знiжана на 4,5 працэнтнага пункта да ВУП у параўнаннi з узроўнем 2005 года. Будуць адменены ўсе абаротныя падаткi.

З 2009 года ў Беларусi ўведзена адна з самых нiзкiх у Еўропе ставак падаходнага падатку з фiзiчных асобаў у памеры 12 працэнтаў. "Аналагiчны падыход закладваецца i на 2010 год", — падкрэслiў Сяргей Сiдорскi.

У Беларусi iдзе працэс паступовага зняцця абмежаванняў на абарачэнне акцый, набытых фiзiчнымi асобамi ў перыяд iльготнай прыватызацыi. "Мы выйшлi на тое, каб акцыi маглi свабодна прадавацца".

Паводле яго слоў, вялiкую цiкавасць замежныя iнвестары сёння праяўляюць да працэсу прыватызацыi ў Беларусi. Цяпер iдзе працэс пераўтварэння ў акцыянерныя таварыствы больш як 470 дзяржаўных арганiзацый. "Мы праводзiм прыватызацыю па формуле "30-40-30". Гэта значыць, што ў 2008 годзе забяспечана 30 працэнтаў плана, у 2009-м — 40 працэнтаў, у 2010-м — яшчэ 30 працэнтаў. Да продажу сёння прапанаваны прыналежныя дзяржаве акцыi 160 акцыянерных таварыстваў", — паведамiў Сяргей Сiдорскi.