Сямігадовая рэканструкцыя гродзенскага заапарку скончыцца ў кастрычніку

Сямігадовая рэканструкцыя гродзенскага заапарку скончыцца ў кастрычніку. Пра гэта “Твайму стылю” паведамілі ва ўпраўленні капітальнага будаўніцтва Гродзенскага аблвыканкама. 

Гродзенцы чакалі адкрыцця абноўленага заапарку ўжо ў ліпені, але на сёння будаўнікі скончылі толькі 70%. Самы сур’ёзны аб’ект са складанымі канструкцыямі – сланоўнік з басейнам і цёплай падлогай. Яго будаўнікі абяцаюць здаць у верасні ўжо разам з абсталяваннем. У верасні будзе таксама гатова і аздоблена ўваходная група заапарку. 



На гэтым жа тыдні будаўнічыя працы скончацца на малпоўні.




У бліжэйшыя дні новае жытло атрымаюць фламінга. А будаўніцтва тэрарыума завершыцца ў жніўні.



Новыя дамы атрымалі фазаны, паўліны і драпежныя птушкі. Пабудаваныя і абжытыя вальеры для буйных жывёл, ваўкоў, зуброў, якаў, казлоў, муфлонаў ды іншых капытных.



Будуецца пляцоўка "Бабулін дворык", дзе дзеці змогуць паназіраць за вясковымі хатнімі жывёламі.