Кубак гарбаты для "замарожанага" пешахода

Источник материала:

Дзяржаўтаінспекцыя арыентаваная на аказанне дапамогі ўдзельнікам дарожнага руху, якія трапілі на дарозе ў цяжкае становішча. Па інфармацыі УДАІ МУС, супрацоўнікі аўтаінспекцыі штодзень аказваюць дапамогу больш як 30 пешаходам (іх падвозяць, пояць гарбатай) і больш як 60 кіроўцам, транспартныя сродкі якіх "замерзлі", і яны вымушаны былі спыніцца на аўтадарогах.

Адначасова ДАІ заклікае пешаходаў быць гранічна пільнымі пры дарожным руху. Чакаючы грамадскі транспарт ці зялёнае святло святлафора на пераходзе, лепш трымацца далей ад краю праезнай часткі, каб пазбегнуць падзення пад транспарт са слізкага бардзюра. Тым больш што чалавека могуць незнарок піхнуць. Цёплая вопратка, шапкі і капюшоны робяць пешаходаў непаваротлівымі, перашкаджаюць ім чуць аўтамабіль, які набліжаецца, кантраляваць дарожную сітуацыю. Таму не трэба рызыкаваць, перабягаючы дарогу, нават калі здаецца, што аўтамабіль яшчэ далёка. Дарогу трэба пераходзіць у вызначаных месцах, прычым лепш пераканацца, што кіроўцы заўважылі пешахода: часам на слізкай дарозе аўтамабіль немагчыма своечасова спыніць.

Сяргей РАСОЛЬКА.