Для заяўнiка Магiлёўскага гарвыканкама — «адно акно»

Источник материала:

«Блуканне людзей па пакутах, па кабiнетах завершана», — лiчыць кiраўнiк спраў гарвыканкама Iгар Аўсеенка. Прынцып «аднаго акна» заключаецца ў тым, што ўсе неабходныя ўзгадненнi розных службаў гарадской улады робяцца без удзелу заяўнiка.

Раней чалавек быў вымушаны самастойна дамагацца прыёму ў розных службах i самастойна хадзiць па кабiнетах. Цяпер жа трэба падаць сваю заяву ў аддзел пiсьмаў i арганiзацыi прыёму грамадзян гарвыканкама, i там жа праз пэўны тэрмiн (ён можа вызначацца паводле закона ад 5 дзён да 2 месяцаў) атрымаць адказ. Гэта датычыцца, у прыватнасцi, тых, хто звяртаецца да ўладаў за атрыманнем зямельнага ўчастка, лiцэнзii, матэрыяльнай дапамогi, за дазволам на будаўнiцтва, за рашэннем на прыватызацыю жылля i гэтак далей.

Праўда, атрыманне ўзгадненняў пакуль абмяжоўваецца толькi службамi, якiя ўваходзяць у склад Магiлёўскага гарвыканкама. Таму тут плануюць у будучым стварыць лакальную электронную сетку, якая звяжа ўсе дзяржаўныя структуры ў межах горада. Аднак для гэтага спачатку трэба вызначыць прынцып электроннага подпiсу.

Пакуль жа «адно акно» запрацавала ў гарвыканкаме, i яго супрацоўнiкi лiчаць, што для людзей, якiя звяртаюцца ў орган улады, сапраўды стала лепш i прасцей вырашаць свае праблемы. Паводле ўказа Аляксандра Лукашэнкi, прынцып «аднаго акна» павiнен быць укаранёны з 2006 года ва ўсiх дзяржаўных установах.