На кандытарскiм рынку абвастраецца канкурэнцыя...

Источник материала:

Да апошняга часу ТАА «Белга» спецыялiзавалася на вытворчасцi шырокага асартыменту глазураў для марожанага, тварожных сыркоў, зефiру, цукерак, мучных кандытарскiх вырабаў, шакаладных мас для вытворчасцi шакаладу. «Белга», дарэчы, стала першым у Беларусi вытворцам шакаладнай глазуры на продаж («Камунарка» i «Спартак» выраблялi яе толькi для ўласных патрэб). За шэсць гадоў магутнасцi прадпрыемства выраслi да 500 тон прадукцыi ў месяц.

«Калi ў нас пытаюцца, як прадпрыемству ўдаецца так iнтэнсiўна развiвацца, — расказвае дырэктар ТАА «Белга» Аляксандр Гулевiч, — мы прапануем усiм бiзнесменам свой «рэцэпт»: зашыйце кiшэнi. Усе свабодныя сродкi ў нас укладваюцца ў развiццё. Зараз на прадпрыемстве працуе абсталяванне вядучых еўрапейскiх фiрмаў, якое дазваляе значна палепшыць якасныя характарыстыкi прадукцыi, скарацiць час яе вытворчасцi i знiзiць выдаткi, што ў вынiку спрыяе знiжэнню сабекошту прадукцыi. Тэхналагiчная схема арганiзавана такiм чынам, што прадпрыемства мае магчымасць адначасова выпускаць некалькi вiдаў прадукцыi па розных рэцэптурах (да 5 рэцэптур), а гэта выключае страты ў якасцi, працоўным часе i сыравiне, непазбежныя пры пераходзе з аднаго асартыменту на другi».

Малавядомы, але цiкавы факт: Беларуская кафейная кампанiя, якой належыць гандлёвая марка «Iдэал», закупляе шакаладную масу ў ТАА «Белга». I ўсё ж такi канкурыраваць на кандытарскiм рынку з «Iдэалам», «Спартаком» цi «Камунаркай» «Белга» не збiраецца. Для таго каб заваяваць сабе «месца пад сонцам», неабходна прапанаваць пакупнiку арыгiнальны тавар.

Так, у работнiкаў прадпрыемства з’явiлася iдэя наладзiць вытворчасць дробсаў, якiя ўяўляюць сабой рознакаляровыя застылыя кроплi глазуры i вырабляюцца на аснове натуральных раслiнных алеяў, сухiх малочных прадуктаў i какава-парашку. Гэты ласунак цудоўна падыходзiць для ўпрыгажэння тартоў, пiрожных, марожанага як у вытворчых, так i ў хатнiх умовах. Фiгурны шакалад таксама пакуль нiхто ў Беларусi не вырабляў. Як i цукеркi з натуральных малочных прадуктаў у выглядзе белых i расфарбаваных натуральнымi фарбавальнiкамi фiгурак. Асвоена на прадпрыемстве i вытворчасць цукровай пудры.

Усе какава-прадукты закупляюцца «Белгай» у Галандыi, цукар выкарыстоўваецца беларускi, а кандытарскi тлушч прыходзiцца набываць у Маскве. Сёння «Белга» рэалiзуе сваю прадукцыю не толькi ў Беларусi, але i ў Расii, краiнах Балтыi. Праўда, канкурэнцыя не заўсёды бывае сумленнай. У ТАА «Белга» лiчаць, што настаў час навесцi на шакаладным рынку парадак.

Нярэдка пад выглядам натуральнага шакаладу цi натуральных шакаладных глазураў прапануюцца розныя iх заменнiкi. Натуральны шакалад заўсёды гатуецца з какававых зярнят, якiя перапрацоўваюцца ў цёртую какаву i какава-алей. Акрамя гэтых двух асноўных кампанентаў натуральны шакалад можа ўключаць таксама цукар, сухое малако, вяршкi i ванiлiн. Перш чым ператварыцца ў звыклую для нас плiтку, будучы шакалад змешваецца i здрабняецца некалькi разоў, i чым драбнейшай будзе шакаладная стружка, тым вышэйшай акажацца i якасць шакаладу.

Натуральны шакалад ва ўсiм свеце лiчыцца дарагiм прадуктам. Таму нядзiўна, што для таго, каб зменшыць затраты на яго вытворчасць, многiя прадпрыемствы фальсiфiкуюць кампаненты шакаладу, замяняючы натуральныя какава-прадукты таннымi гiдрагенiзаванымi тлушчамi, соевымi прадуктамi i лупiнай какававых зярнят. Танны прадукт заўсёды прыцягвае ўвагу. Напрыклад, беларускiя хлебазаводы закупляюць шакаладныя глазуры для кандытарскiх вырабаў ў расiян, хаця гэты прадукт i не мае права называцца натуральным.

Дарэчы, заўважана, што попыт на салодкую прадукцыю мае дакладна выражаную сезонную залежнасць: вясной i летам пачынаюць расцi аб’ёмы продажаў марожанага, а шакалад i шакаладныя цукеркi «пыляцца» на магазiнных палiцах, затое восенню-зiмой гандаль шакаладнымi вырабамi прыкметна ажыўляецца. Група французскiх дыетолагаў i нарколагаў устанавiла прамую залежнасць памiж шакаладам i настроем чалавека. Высветлiлася, што ў састаў какававых зярнят уваходзiць рэчыва, якое, хутка ўсмоктваючыся ў кроў, аказвае моцнае ўздзеянне на цэнтр задавальнення галаўнога мозга.

Пастаяннае ўмеранае спажыванне шакаладу, сцвярджаюць навукоўцы, павышае працаздольнасць арганiзма i здольна павялiчыць працягласць жыцця. А так званы шакаладны водар можа нават абаранiць арганiзм чалавека ад грыпу.