Прымае Белдзяржунiверсiтэт

Источник материала:

Асноўным уступным iспытам на дзённым i завочным аддзяленнi з’яўляецца цэнтралiзаванае тэсцiраванне. Абiтурыентам неабходна прадаставiць сертыфiкаты трох цэнтралiзаваных тэсцiраванняў на большасць факультэтаў i спецыяльнасцяў, у прыватнасцi, на факультэты — эканамiчны, юрыдычны (спецыяльнасцi: палiталогiя, эканамiчнае права, правазнаўства, акрамя выпускнiкоў юрыдычнага каледжа), фiласофii i сацыяльных навук, мiжнародных адносiнаў, ваенны (спецыяльнасцi: псiхалогiя, правазнаўства, мiжнародныя адносiны), гуманiтарны (спецыяльнасцi: мiжнародныя адносiны, сацыялогiя, сучасныя замежныя мовы, псiхалогiя, iнфарматыка, сацыяльная работа, менеджмент), Дзяржаўны iнстытут кiравання i сацыяльных тэхналогiй (спецыяльнасцi: сацыяльная работа, менеджмент, правазнаўства), Iнстытут бiзнэсу i менеджменту тэхналогiй.

На асобныя факультэты i шэраг спецыяльнасцяў, акрамя двух сертыфiкатаў тэсцiравання, абiтурыентам неабходна здаць адзiн экзамен — профiльны (вусны/пiсьмовы, вусны з пiсьмовым заданнем) або творчы (малюнак, свабодная кампазiцыя, творчае сачыненне, творчае тэсцiраванне). Гэта патрабуецца на факультэтах: механiка-матэматычным, прыкладной матэматыкi i iнфарматыкi, радыёфiзiкi i электронiкi, хiмiчным, геаграфiчным, бiялагiчным, гiстарычным, фiлалагiчным, журналiстыкi, юрыдычным (спецыяльнасць правазнаўства для выпускнiкоў юрыдычнага каледжа), ваенным (спецыяльнасцi: хiмiя, журналiстыка, геаграфiя), гуманiтарным (спецыяльнасць: дызайн), а таксама ў Дзяржаўным iнстытуце кiравання i сацыяльных тэхналогiй (спецыяльнасцi: дызайн, мастацтвазнаўства), Iнстытуце тэалогii iмя Святых Мяфодзiя i Кiрылы.

Сёлета ў Белдзяржунiверсiтэце з’явiлiся дзве новыя спецыяльнасцi — «вэб-праграмiраванне i Iнтэрнэт-тэхналогii» на механiка-матэматычным i «гiдраметэаралогiя» на геаграфiчным факультэтах. На першую спецыяльнасць, на дзённае бюджэтнае аддзяленне плануецца прыняць 15 чалавек, на дзённае платнае — 10, на «гiдраметэаралогiю», на дзённае бюджэтнае i платнае навучанне — 10 чалавек.

На 1-ы курс дзённай формы навучання плануецца прыняць на бюджэтнай аснове 1936 чалавек, на платнай — 2030. План прыёму на завочнае аддзяленне — 450 (бюджэтная форма) i 1105 (платная форма). Дарэчы, сёлета на завочную бюджэтную форму навучання прымаюцца асобы толькi з сярэдняй спецыяльнай адукацыяй або з вопытам работы па выбранай спецыяльнасцi. Выпускнiкi школ маюць права паступаць на завочнае аддзяленне на платнай аснове. Пазаконкурсны прыём не будзе ажыццяўляцца на спецыяльнасцi, конкурс на якiя ў 2005 годзе склаў 5 i больш чалавек на месца.

Абiтурыенты, якiя не прайшлi па конкурсу на дзённае бюджэтнае аддзяленне, могуць падаць дакументы на завочнае бюджэтнае да 7 жнiўня, а на дзённае i завочнае платныя аддзяленнi — да 9 жнiўня. Залiчэнне на дзённае бюджэтнае навучанне завершыцца 6 жнiўня, на завочнае бюджэтнае — 8 жнiўня, на дзённае i завочнае платнае навучанне — 11 жнiўня.