7—8 грамаў спiрту на 1 кг вагi — смяротная доза!

Источник материала:

«Градус нацыi»

Сёлета на 1 лiпеня агульная колькасць хворых наркалагiчнага профiлю склала 260 372 чалавекi, у тым лiку хворых на алкагалiзм — 172 552 чалавекi, хворых на наркаманiю — 6126 чалавек i таксiкаманiю — 574 чалавекi.

За першае паўгоддзе 2006 года пад нагляд наркалагiчнай службы трапiлi 42 252 чалавекi, у тым лiку 6847 жанчын i 6678 непаўналетнiх. А знятыя з улiку 39 333 чалавекi: 25 441 — у сувязi з вылечваннем алкагольнай залежнасцi i 3579 — у сувязi з наступленнем смерцi.

Летась ад розных прычын, звязаных са спажываннем алкаголю, у Беларусi загiнулі 10 409 чалавек: 117 загiнулi ў вынiку спажывання сурагатаў алкаголю, 3209 чалавек — ад выпадковага атручэння алкаголем, 5147 — ад няшчасных выпадкаў i траўмаў, звязаных з алкаголем, i 2116 — ад суiцыдаў, якiя былi здзейсненыя ў стане алкагольнага ап’янення.

За 8 месяцаў гэтага года ад выпадковага атручэння алкаголем загiнулі яшчэ 1980 чалавек (за адпаведны перыяд 2005 года — 2631 чалавек). Паводле меркавання спецыялiста, узровень спажывання алкагольных напояў насельнiцтвам Беларусi застаецца надзвычай высокiм — сёння ён складае 9,35 лiтра абсалютнага алкаголю на душу насельнiцтва, уключаючы немаўлят (у 1995 годзе гэты паказчык складаў 6,7 лiтра). Пры гэтым трэба мець на ўвазе, што ў афiцыйную статыстыку не трапляе алкагольная прадукцыя, якая вырабляецца саматужным спосабам.

— Алкаголь або этылавы спiрт з’яўляецца моцным наркатычным ядам, якi ўздзейнiчае, у першую чаргу, на клеткi галаўнога мозга i паралiзуе iх, — тлумачыць Уладзiмiр Максiмчук. — Доза 7—8 грамаў чыстага спiрту на 1 кг вагi — смяротная для чалавека. Алкаголь аказвае на арганiзм глыбокае i працяглае ўздзеянне: напрыклад, усяго 80 грамаў алкаголю дзейнiчаюць на працягу 24 гадзiн.

Навукоўцы даказалi, што няма бяспечных i тым больш карысных доз алкаголю: усяго 100 грамаў гарэлкi знiшчаюць 7,5 тысячы актыўна працуючых клетак галаўнога мозга. А пры вельмi высокiм утрыманнi алкаголю ў крывi парушаецца работа той часткi мозга, якая кiруе нашым дыханнем, таму чалавек можа загiнуць з-за паралiчу дыхання. У маладых людзей алкагольная залежнасць развiваецца ў 6—8 разоў хутчэй, а спажыванне спiртных напояў ва ўзросце да 20 гадоў завяршаецца развiццём алкагалiзму ў 80 працэнтах выпадкаў...