Аляксандр ЛУКАШЭНКА: «У дзяржавы i царквы адны i тыя ж мэты — грамадская згода i адзiнства народа»

Источник материала:

Учора адбылася сустрэча Прэзiдэнта Беларусi Аляксандра Лукашэнкi з членамi ciнода Беларускай праваслаўнай царквы. Падобныя сустрэчы напярэдаднi новага года сталi ўжо традыцыйнымi.

Мiтрапалiт Фiларэт выказаў удзячнасць за праяўленне падтрымкi духоўнай адукацыi. У сувязi з гэтым ён звярнуўся па падтрымку ў вырашэннi пытання прызнання дзяржавай дыпломаў царкоўных навучальных устаноў i вучоных ступеняў кандыдатаў i дактароў тэалогii. Таксама ён лiчыць неабходным пашырыць выкладанне духоўных i рэлiгiйных прадметаў у навучальных установах.

Прагучалi просьбы садзейнiчання i ў iншых пытаннях: зацвярджэння ўрадам прадметаў рэлiгiйнага прызначэння; праблемы незаконнага выкарыстання рэлiгiйнай сiмволiкi i найменняў, а таксама рэалiзацыi царкоўных тавараў камерцыйнымi арганiзацыямi без царкоўнага блаславення; удакладнення паняцця культавых будынкаў i збудаванняў; запазычанасцi па падатках на зямлю праваслаўных арганiзацый, што маюць культавыя будынкi, якiя яшчэ будуюцца; прадастаўлення льготных тарыфаў на энерганосьбiты ў больш спрошчаным парадку; выдзялення зямельных участкаў для некаторых мiнскiх прыходаў i iнш.

Мiтрапалiт Фiларэт падкрэслiў, што «плённае супрацоўнiцтва царквы i дзяржавы складае аснову для згуртавання нашага грамадства на аснове традыцыйных шматвекавых каштоўнасцяў беларускага народа». Менавiта ў гэтым згуртаваннi бачна «праўда нашага жыцця».

А. Лукашэнка назваў Беларусь шматканфесiйнай краiнай, а таму i палiтыка ў ёй «накiравана на падтрымку верацярпiмасцi, мiру i згоды памiж людзьмi розных веравызнанняў». Пры гэтым роля праваслаўя ў гiсторыi Беларусi будзе заўсёды памятацца i цанiцца. Паводле слоў кiраўнiка дзяржавы, праваслаўная царква «заўсёды была з народам, стабiлiзавала грамадства, дапамагала ўтрымлiваць людзей ад пароку».

Рознабаковая дзейнасць праваслаўнай царквы, яе аўтарытэт, узаемадзеянне з iншымi гiстарычнымi традыцыйнымi канфесiямi — важны фактар захавання палiтычнай i сацыяльнай стабiльнасцi на беларускай зямлi. А. Лукашэнка лiчыць, што праваслаўная царква з гонарам выконвае сваю духоўную i сацыяльную мiсiю, падтрымлiвае дзяржаву ва ўсiх пачынаннях, што накiраваны на захаванне маральнага здароўя народа.

За год, якi мiнуў з часу апошняй сустрэчы прэзiдэнта з сiнодам, «удалося нямала зрабiць для развiцця супрацоўнiцтва». Калi 5 гадоў таму вызначалiся асноўныя накiрункi ўзаемадзеяння, то сёння, з задавальненнем адзначыў А. Лукашэнка, «яны развiваюцца дынамiчна i шматпланава».

Кiраўнiк дзяржавы адзначыў, што ўрад аказвае значную дапамогу ва ўмацаваннi матэрыяльнай базы праваслаўнай царквы. Так, на працягу некалькiх гадоў прадастаўлялася фiнансавая дапамога Мiнскiм духоўным акадэмii i семiнарыi. У 2006 годзе на рэканструкцыю iх вучэбнага корпуса накiравана больш за 5 млрд рублёў, у наступным годзе выдзеляць яшчэ 2,5 млрд рублёў. Фiнансавая падтрымка аказваецца i пры ўзвядзеннi Духоўна-адукацыйнага цэнтра ў Мiнску (у гэтым годзе выдзелена больш за1,5 млрд рублёў, у наступным плануецца выдзелiць яшчэ больш за 6 млрд рублёў). Пры падтрымцы дзяржавы будуецца i яшчэ адзiн унiкальны аб’ект — Храм-помнiк у гонар Усiх Святых, якi павiнен стаць сiмвалам духоўнага багацця зямлi, яе культурных i гiстарычных традыцый.

А. Лукашэнка лiчыць вельмi важным тое, што царква пачынае на новым узроўнi ўключацца ў працэс сацыяльнай службы грамадству. Яшчэ адзiн плённы накiрунак яе дзейнасцi — духоўна-маральнае аздараўленне грамадства. Пры гэтым А. Лукашэнка адзначыў, што «нашы магчымасцi ў гэтай галiне яшчэ далёка не вычарпаны, мы можам працаваць нашмат эфектыўней». «Я чакаю большай актыўнасцi ў сацыяльнай сферы, — адзначыў ён. — Упэўнены — дзяржава i царква могуць яшчэ шмат зрабiць на нiве духоўнага росквiту нашага народа». Пры гэтым А. Лукашэнка падкрэслiў, што людзi чакаюць «ад нас канкрэтных спраў, рэальнай дапамогi ў вырашэннi iх жыццёвых праблем».

А. Лукашэнка пракаментаваў некаторыя прапановы Мiтрапалiта Фiларэта. Да праблемы абортаў неабходна падыходзiць асцярожна. Паводле слоў кiраўнiка дзяржавы, ад бацькоў цяжка патрабаваць нараджаць дзяцей, калi ў iх не вырашана жыллёвая праблема, калi ў iх складанае сацыяльна-эканамiчнае становiшча. Сем’i разумеюць, што яны змогуць даць аднаму дзiцяцi лепшае выхаванне i адукацыю, чым пяцi. У той жа час нельга забываць i пра «духоўны крызiс», аб якiм казаў Уладыка. Духоўнае выхаванне царквы ў гэтым пытаннi будзе вельмi карысным.

Што датычыцца прызнання дыпломаў i ступеняў, то «на першы погляд» кiраўнiк дзяржавы не бачыць у гэтым пытаннi негатыву.

Увогуле пры абмеркаваннi рэлiгiйных пытанняў, праблем царквы А. Лукашэнка жадаў бы чуць паболей дыскусiй. Ставiць праваслаўную iдэю ў аснову дзяржаўнай iдэалогii пакуль нельга. У той жа час дзяржава не будзе адхiляцца ад царквы. Паводле слоў кiраўнiка дзяржавы, толькi ўзаемнае супрацоўнiцтва можа даць неабходны эфект.

Сяргей КАРАЛЕВIЧ.