Сацыяльны «бонус» трэба зарабiць

Источник материала:

Блiзкасць Мiнска — патэнцыяльная кадравая праблема для любога прысталiчнага прадпрыемства. У «Ждановiчах» гэтае пытанне вырашаецца праз стварэнне прывабных умоў для работнiкаў. На агракамбiнаце забяспечваецца шэраг сацыяльных гарантый. Па-першае, тут стабiльна павялiчваюцца заробкi. За мiнулы год сярэднi памер аплаты працы склаў каля 650 тысяч рублёў. Як адзначыла галоўны эканамiст агракамбiната «Ждановiчы» Ала Навумовiч, у блiжэйшай перспектыве тут плануюць перайсцi да выплаты так званай «трынаццатай зарплаты», памер якой напрамую будзе залежаць ад паказчыкаў працы, канкрэтнага ўдзелу кожнага ў атрыманнi агульнага вынiку.

Паспяхова вырашаецца i жыллёвая праблема работнiкаў. Многiя з тых, хто не меў свайго ўласнага «кута», атрымалi кватэры ў новым дзевяцiпавярховым доме. Гаспадарка аказала фiнансавую дапамогу — усiм забудоўшчыкам была выдзелена беспрацэнтная пазыка. Яе памер залежаў ад стажу работнiка. Будуюцца i сучасныя катэджы: у прыватнасцi, у вёсцы Гарадзiшча ў 2005 годзе было ўзведзена 5 дамоў, а летась — яшчэ 6. Паводле слоў Алы Навумовiч, сёлета фармiруецца яшчэ адзiн маладзёжны жыллёва-будаўнiчы кааператыў. Плануецца, што ў Гарадзiшчы праз пэўны час здадуць у эксплуатацыю новы пяцiпавярховы дом. Так што ўлазiны ў агракамбiнаце становяцца амаль прывычнай з’явай.

Зразумела, што ўсе сацыяльныя перавагi сталi магчымымi перш за ўсё за кошт росту вытворчасцi. За 6 апошнiх гадоў валавы намалот збожжа ў гаспадарцы павялiчыўся ў шэсць разоў. Не стаў выключэннем i мiнулы год — гаспадарка сабрала 28 тысяч тон збожжа (i «плюсанула» да папярэдняга паказчыку больш чым на 4 тыс. т). Гэта практычна пятая частка агульнага «валу» ўсяго Мiнскага раёна. Летась валавая вытворчасць малака склала больш чым 13,8 тысячы тон, а сярэднi надой ад каровы — амаль 6,3 тыс. лiтраў (на селекцыйным кароўнiку фермы «Тарасава» ад кожнай каровы надоена больш чым па 10 тыс. лiтраў — гэта ўзровень лепшых замежных вытворцаў). Як паведамiла Ала Навумава, у перспектыве плануецца пабудаваць новы жывёлагадоўчы комплекс на тысячу галоў. Акрамя ўсяго iншага, гаспадарка атрымала статус племяннога завода. Рэалiзацыя бычкоў прыносiць добрыя грошы.

Неаднойчы даводзiлася чуць, як у крамах людзi цiкавiлiся менавiта «ждановiцкiмi» агуркамi i таматамi, аддаючы перавагу iм, а не, напрыклад, iспанскiм альбо галандскiм. Яно i не дзiўна, бо агракамбiнат «Ждановiчы» — прызнаны лiдар па вытворчасцi гароднiны ў цяплiцах. Ёсць попыт — ёсць i прапанова: летась было сабрана i рэалiзавана больш чым 7,5 тысячы тон вiтамiннай прадукцыi. Вырошчванне агуркоў i таматаў адбываецца па сучаснай галандскай тэхналогii, якая забяспечвае збалансаванае «харчаванне» раслiн i высокую якасць агароднiны. «На палiцах крамаў першыя агуркi новага ўраджаю з’явяцца дзесьцi ў пачатку сакавiка, а таматы — крыху пазней», — паведамiлi на агракамбiнаце. Так што ўжо да жаночага свята можна будзе пакаштаваць свежай айчыннай агароднiны.

Цяплiчная гаспадарка ў «Ждановiчах» — адна з самых вялiкiх у Беларусi. На працягу апошнiх дзесяцi гадоў тут пастаянна праводзiцца мадэрнiзацыя. У цяплiцах з кожнага квадратнага метра збiраюць больш чым па 50 кiлаграмаў агароднiны. Дарэчы, гэта лепшы паказчык у Беларусi. У сваёй справе агракамбiнат з’яўляецца сапраўдным «заканадаўцам моды». Шмат напрацовак, якiмi карыстаюцца адпаведныя прадпрыемствы, упершыню атрымалi «пуцёўку ў жыццё» менавiта на гэтым сельгаспрадпрыемстве.

На працягу мiнулага года была пабудавана новая цяплiца. Яе агульны кошт складае 48 мiльярдаў рублёў. Гэта, напэўна, адзiн з самых буйных праектаў не толькi ў раёне, але i ва ўсёй Мiнскай вобласцi. Такiя ўкладаннi пралiчаныя, паколькi вырошчванне агароднiны тут адбываецца па прынцыпова новых тэхналогiях. Як мяркуецца, агульны гадавы аб’ём вытворчасцi агароднiны значна ўзрасце. У новай цяплiцы ўстаноўлена сучаснае энергазберагальнае абсталяванне, якое дазволiць рэальна зменшыць затраты, а значыць, павялiчыць эканамiчныя паказчыкi.

Многiя накiрункi дзейнасцi агракамбiната «Ждановiчы» i ўвогуле ўнiкальныя. У 2001 годзе тут створана ўласная лабараторыя па развядзенню чмялёў. «Крылатае пагалоўе» не толькi выкарыстоўваюць для ўласных патрэб, але i прадаюць iншым айчынным цяплiчным прадпрыемствам. Дарэчы, развядзенне чмялёў аказалася карыснай i надзвычай выгаднай справай — лабараторыя дазваляе агракамбiнату штогод эканомiць да 25 тысяч долараў.