Паспець, пакуль бярозы не зацвiтуць

Источник материала:

Вельмi важна сяўбу правесцi ў аптымальныя тэрмiны, бо тутэйшыя глебы лёгкiя i хутка губляюць патрэбную для раслiн вiльгаць. Калi спазнiцца, то мiнеральныя ўгнаеннi проста не «спрацуюць» — сухавей выдзьме. Усе работы неабходна выконваць у «падвоеным фармаце», паколькi да «Сiвiцы» летась далучылi адстаючы СВК «Iвянецкi», у вынiку чаго агульная плошча сельскагаспадарчых палеткаў у аб’яднанай гаспадарцы зараз складае каля 5 тысяч гектараў.

— Даводзiцца iсцi на пэўную рызыку: калi ранiцай пачынаем сеяць, то зямля яшчэ белая — уначы здараюцца замаразкi, — кажа старшыня СВК «Сiвiца» Iгар Часнок. — Аднак гэта не лiстападаўскiя маразы, а красавiцкiя, таму трэба выходзiць у поле. Не ўкласцiся ў тэрмiны сяўбы — значыць застацца без ураджаю. Тэхнiкi хапае, парк апошнiм часам значна абнавiлi.

На сяўбе праходзiць «абкатку» нямецкi пасяўны агрэгат, якi гаспадарка набыла ў лiзiнг пад гарантыю райвыканкама. Замежная тэхнiка вельмi прадукцыйная — сеялка за адзiн праход выконвае адразу некалькi тэхналагiчных аперацый. Гэта дазваляе эканомiць палiва, паколькi хуткасць i якасць работы значна павялiчваюцца. Зразумела, што такую тэхнiку абы каму не даручыш. Генадзь Калоска — вопытны механiзатар, у гаспадарцы пятнаццаць гадоў. Таму замежную сеялку асвоiў без асаблiвых цяжкасцяў i зараз завiхаецца на палетках не горш, чым сапраўдны нямецкi фермер. «Трэба працаваць старанна, за сяўбу можна добра зарабiць, — дзелiцца Генадзь Раманавiч. — У сярэднiм зараз у дзень па 30 тысяч выходзiць».

У гаспадарцы падлiчылi, што за пасяўную лепшыя механiзатары могуць зарабiць больш чым мiльён рублёў. Вынiкi штодня вывешваюцца каля канторы, таму кожны можа назiраць за тым, з чаго «складаецца» яго заробак. Пасля цукровых буракоў на чарзе кармавыя, а пасля трэба i за бульбу з агароднiнай брацца.

— Усе веснавыя работы на полi неабходна выканаць, пакуль бяроза не зацвiце — ёсць такая народная прыкмета, — заўважае Iгар Часнок. — Трэба паспець...

Валожынскi раён.