Нягоднiк, Дзед-Барадзед i студэнты з пiвам

Источник материала:

Слухай сваё

Як сцвярджаюць самi музыканты, альбом «выпакутаваны лянотай i часам». За той час, пакуль пласцiнка рыхтавалася, удзельнiкi гурта паспелi абзавесцiся сем’ямi, з’явiлiся ў «Лепрыконсах» i новыя персанажы — напрыклад, Аляксандр Лiпнiцкi, чыя сястра Таццяна зараз раскручаная ў Расii пад псеўданiмам Б’янка. Затое нiкуды не падзеўся акардэанiст Федзя Федарук разам з iнструментам, дый сам Iлья Мiцько са сваiм фiрменным «пафiгiсцкiм» пачуццём гумару. Адпаведна, i песнi на альбоме атрымалiся такiя — сакавiтыя, як смачныя яблыкi, ад якiх цяжка адарвацца, пакуль не з’ясi ўвесь кiлаграм. Праўда, нiчога падобнага да знакамiтай «Халi-Галi» на пласцiнцы няма, i гэта да лепшага — «Лепрыконсы», як i ўсякi творчы арганiзм, выраслi з кароткiх штонiкаў. А яшчэ пабудавалi сабе ўласную студыю гуказапiсу SUРЕR8, дзе можна i рэпецiраваць да пасiнення, i новую кампазiцыю ў 1001 варыянце запiсаць, i проста адпачыць душой i целам...

Жывыя «Ледаколы»

Гурт «J:Mорс» — бадай, адзiн з самых папулярных на сёння беларускiх калектываў. Калi ўвогуле не самы. На iх канцэрты заўжды не хапае бiлетаў, а песнi адразу кладуцца на вуха i на памяць, так што «гучаць з кожнага прасу» — гэта практычна пра iх. Калi каму не давялося нiводнага разу трапiць на жывы канцэрт гурта, упушчэнне можна лёгка паправiць — канцэртны праект «Ледаколы livе» з’явiўся ў продажы ў двух фарматах: на СD I DVD. Паводле ацэнак экспертаў, гэта першы «канцэртнiк», зроблены беларускiм гуртом у Беларусi i для беларусаў.

На кожным дыску — 15 кампазiцый, запiсаных у лютым 2007-га на аншлагавым сольным канцэрце ў Мiнску, ад «Wеb-дызайну» i «Монтэвiдэа» да «Прынцэсы» i «Басанож па маставой». Акрамя таго, на DVD у якасцi бонусу змешчана фотагалерэя з канцэрта, а на СD — буклет з тэкстамi i акордамi ўсiх песень (апошняе, дарэчы, прыдумаў у падарунак прыхiльнiкам лiдар гурта Уладзiмiр Пугач). Прадзюсарам вiдэаверсii канцэрта выступiў намеснiк генеральнага дырэктара канала СТБ Павел Каранеўскi, а сам запiс, уласна кажучы, некалькi разоў i быў паўтораны на канале.

У падтрымку праекта рэжысёр Максiм Сiры зняў клiп на песню «Ледаколы», але ў кадры, акрамя ўласна музыкантаў, зусiм не караблi, а... самалёты. Дакладней, першыя палёты, задакументаваныя на кiнастужках. Удзельнiкi гурта лiчаць, што гэты вiдэарад найлепш перадае настрой песнi, хоць у гэтым настроi, як правiла (прыгадаем «Вiславухую прынцэсу») без ста грамаў не разабрацца...

«Сонца» з беларускiм каларытам

Крыху больш як два гады iснуе вакальны калектыў Федэрацыi прафсаюзаў Беларусi — арт-група «Беларусы» — а ўжо запiсаны першы альбом «Сонца». Столькi часу спатрэбiлася зусiм не таму, што справай займалiся непрафесiяналы — наадварот, у складзе гурта сямёра выпускнiкоў i студэнтаў Беларускай акадэмii музыкi, выканаўцы з бездакорнай адукацыяй. Проста ўдзельнiкi калектыву першапачаткова былi арыентаваны на жывыя канцэрты, якiх толькi ў першы год iснавання паспелi даць 30 сольных i 50 зборных. Зараз рытм зусiм iншы — у месяц даецца ад 10 да 20 канцэртаў, ды яшчэ iдуць заняткi ў эстрадна-вакальнай студыi, дзе займаецца каля 150 чалавек. На базе студыi, дарэчы, створаны жаночы ансамбль «Формула кахання», якi падтрымлiвае «Беларусаў» на гастролях.

Зараз у рэпертуары «Беларусаў», паводле слоў мастацкага кiраўнiка калектыву Валерыя Шмата, каля 100 песень рознага накiрунку, ад духоўных да народных, прычым спяваць арт-група, калi спатрэбiцца, можа на сямi розных мовах — рускай, беларускай, польскай, лацiнскай, iтальянскай, iўрыце, iдышы. Але ў альбом увайшлi толькi 14 кампазiцый, адабраных па прынцыпу разнастайнасцi — усё, што можна прыгожа праспяваць мужчынскiм шматгалоссем. Падобна да хору Турэцкага, але не зусiм тое — большая эстраднасць музычнага накiрунку i большая празрыстасць гучання (але гэта ўжо заўважаць толькi прафесiяналы). Зрабiць свае асабiстыя высновы пра «Беларусаў», дарэчы, можна i не слухаючы дыск — у маi калектыў гастралюе па Вiцебскай вобласцi, на чарзе — Брэсцкая.